ក្រសួងអប់រំ កំពុងស៊ើបអង្កេតករណីគ្រូបង្រៀនផ្ញើសារឱ្យសិស្សស្រីផ្ញើរូបអាសអាភាស
ភ្នំពេញ៖ ក្រសួងអប់រំ យុវជន និងកីឡា កំពុងស៊ើបសួរ លើករណី គ្រូបង្រៀន ផ្ញើសារលួងលោមឱ្យសិស្សស្រីផ្ញើរូបអាសអាភាស ជាថ្នូរការទទួលបានពិន្ទុខ្ពស់ និងនិទ្ទេសល្អ។ អ្នកស្រី ឃួន វិច្ឆិកា អ្នកនាំពាក្យក្រសួងអប់រំ បញ្ជាក់ប្រាប់សារព័ត៌មានឌីជីថលថ្មីៗដូច្នេះ នៅរសៀលថ្ងៃទី២៣ ខែកក្កដា។
«គណៈគ្រប់គ្រងបានអញ្ជើញលោកគ្រូ មកដើម្បីស៊ើបសួរហើយ ពេលនេះកំពុងស្ថិតក្នុង ការប្រជុំពិនិត្យ និងធ្វើចំណាត់ការបន្ត»។ នេះជាសំណេរខ្លីរបស់ អ្នកស្រី ឃួន វិច្ឆិកា ផ្ញើមកកាន់សារព័ត៌មានថ្មីៗ តាមតេឡេក្រាម។
ចំណាត់ការករណីនេះ គឺបន្ទាប់ពីមានអ្នកប្រើប្រាស់បណ្ដាញសង្គម បាននាំគ្នាចែកចាយសារឆ្លើយឆ្លងរវាងគ្រូ និងសិស្សសាលាមួយស្ថិត ក្នុងភូមិព្រែកដូង ឃុំកំពង់ស្វាយ ស្រុក កៀនស្វាយ ខេត្តកណ្ដាល។ ក្នុងសារសន្ទនា ដែលបានបែកធ្លាយនោះ គ្រូបង្រៀន បានផ្ញើសារលួងលោមផង និងពេលខ្លះជាសារកម្លាផង ដើម្បីឱ្យសិស្សថតរូបអាក្រាត ផ្ញើឱ្យខ្លួនជាថ្នូរនឹងពិន្ទុ និងនិទ្ទេសល្អ។ ក្រៅពីខ្លឹមសារសន្ទនា ក៏មានការបង្ហោះពីសិស្សខ្លះទៀត ដែលបានរងគ្រោះដោយសារតែគ្រូបង្រៀនរូបនោះ បានប្រើហិង្សាផ្លូវកាយ និងផ្លូវចិត្ត ព្រោះតែមិនចូលរៀនក្រៅម៉ោង(រៀនគួរ)ជាមួយខ្លួនទៀតដែរ។
ទោះយ៉ាងណា ក្រោយសារសន្ទនានោះបែកធ្លាយ គ្រូបង្រៀនរូបនោះ បានបង្ហោះសារលើគណនីហ្វេសប៊ុកឈ្មោះ បង វី ដោយសូមការអភ័យទោស ពីគណៈគ្រប់គ្រងសាលា និងសាធារណជន និងបានអះអាងថា សារសន្ទនារវាងខ្លួន និងសិស្សស្រី ជាការលេងសើចផ្ទាល់ខ្លួន មិនពាក់ព័ន្ធជាមួយអាជីពជាគ្រូឡើយ។
គ្រូបង្រៀនរូបនេះ ថែមទាំងថ្លែងការពារទៀតថា មិនបានប៉ះពាល់ ឬបៀតបៀនកេរ្តិ៍ខ្មាស និងគំរាមកំហែងសិស្សឡើយ ប៉ុន្តែជាការពន្យល់ផ្ដល់ដំបូន្មាន ជំរុញឱ្យសិស្សប្រឹងប្រែងរៀនសូត្រ និងធ្វើជាសិស្សល្អ។
ជុំវិញករណីនេះ សាធារណជន នឹងរង់ចាំស្តាប់ការពន្យល់លម្អិតពីក្រសួងអប់រំ និងចំណាត់ការបន្តលើគ្រូបង្រៀនរូបនោះ៕