វៀតណាមស្នើអាម៉េរិកពិចារណាឡើងវិញការហាមឃាត់ការនាំចេញអាហារសមុទ្រ
វៀតណាម បានស្នើឲ្យអាម៉េរិកពិចារណាឡើងវិញការហាមនាំចេញផលិតផលសមុទ្រចាប់ពីឆ្នាំ២០២៦។ ការហាមនេះ និងពន្ធថ្មីរបស់អាម៉េរិក ទំនងអាចប៉ះពាល់យ៉ាងខ្លាំងដល់ការនាំចេញសមុទ្រសំខាន់ៗ និងជីវភាពអ្នកនេសាទវៀតណាម។
ទីក្រុងហាណូយ បានស្នើសុំអាម៉េរិកឱ្យពិចារណាម្ដងទៀតនូវការសម្រេចចិត្តមួយដែលអាចនាំឱ្យមានការហាមឃាត់ចែកចាយម្ហូបសមុទ្រវៀតណាមខ្លះទៅទីផ្សារអាម៉េរិកចាប់ពីឆ្នាំក្រោយ។ លោក Nguyen Hong Dien រដ្ឋមន្រ្តីក្រសួងឧស្សាហកម្ម និងពាណិជ្ជកម្មវៀតណាម នៅថ្ងៃទី ១៥ កញ្ញា បានផ្ញើលិខិតទៅលោក Howard Lutnick រដ្ឋមន្រ្តីពាណិជ្ជកម្មអាម៉េរិក ដើម្បីស្នើឱ្យពិចារណាម្ដងទៀតនូវការសម្រេចចិត្តកាលពីខែមេសារបស់រដ្ឋបាលមហាសមុទ្រអាម៉េរិក។ ការសម្រេចចិត្តនេះ ផ្អែកលើការរកឃើញថា វិធីនេសាទត្រីខ្លះៗរបស់វៀតណាមអាចបង្កការគ្រោះថ្នាក់ដល់សត្វសមុទ្រ។
អាម៉េរិក គឺជាទីផ្សារសំខាន់បំផុតសម្រាប់គ្រឿងសមុទ្រវៀតណាម ដោយការនាំចេញចន្លោះខែមករា ដល់សីហា កើនឡើង ៦.៩ភាគរយ ប្រៀបធៀបនឹងឆ្នាំមុន ដែលមានទំហំ១.២៤ ពាន់លានដុល្លារ ហើយស្មើនឹង១៧.៣ភាគរយនៃការនាំចេញគ្រឿងសមុទ្រទាំងមូលរបស់វៀតណាម។
កាលពីខែសីហាកន្លងទៅ រដ្ឋបាលមហាសមុទ្រអាម៉េរិក ក៏បានជូនដំណឹងទៅក្រសួងកសិកម្មវៀតណាមជុំវិញការបដិសេធតាមច្បាប់ការពារសត្វសមុទ្រ ដោយសារតែរបៀបនេសាទត្រី១២ ប្រភេទរបស់វៀតណាម។ ការណ៍នេះ នឹងធ្វើឲ្យវៀតណាមត្រូវហាមឃាត់មិនឲ្យនាំចេញត្រី និងផលិតផលសមុទ្រចូលទៅអាម៉េរិក ចាប់ពីថ្ងៃទី១ ខែមករា ឆ្នាំ២០២៦។
ក្រសួងពាណិជ្ជកម្មវៀតណាមបានព្រមានថា ការហាមនេះនឹងប៉ះពាល់ដល់ផលិតផលសមុទ្រសំខាន់ៗរួមមាន ត្រីទូណា ត្រីដាវ ក្តាម និងមឹកជាដើម។ រដ្ឋមន្ត្រីកសិកម្ម Tran Hong Ha Dien បានផ្ញើលិខិតទៅអាម៉េរិកដោយឡែក និងស្នើឲ្យពិចារណាកែសម្រួលសេចក្តីសម្រេច ដើម្បីជៀសវាងការរំខានក្នុងពាណិជ្ជកម្ម និងការពាររបររស់នៅរបស់ប្រជាជននេសាទវៀតណាមរាប់រយពាន់នាក់។
ក្នុងឆ្នាំ២០១៧ វៀតណាមក៏បានទទួលកាតលឿងពីសហភាពអឺរ៉ុប ដោយសារមិនអនុវត្តវិធានការគ្រប់គ្រាន់ក្នុងការប្រយុទ្ធប្រឆាំងនឹងការនេសាទខុសច្បាប់៕