ក្រសួងមហាផ្ទៃ ចាត់ទុកទង្វើរបស់ថៃមកលើពលរដ្ឋកម្ពុជា ជាការរំលោភបំពានលើសិទ្ធិជាមូលដ្ឋានរបស់មនុស្សជាតិ
ភ្នំពេញ៖ ក្រសួងមហាផ្ទៃ បានចេញសេចក្ដីថ្លែងការណ៍ថ្កោលទោសលើសកម្មភាពនគរបាល និងកម្លាំងចម្រុះថៃចូលបំពានដែនដី និងធ្វើទុក្ខបុកម្នេញលើពលរដ្ឋខ្មែរ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ចំពោះទង្វើនេះ ក្រសួងមហាផ្ទៃ ចាត់ទុកថា ជាការរំលោភពលើសិទ្ធិជាមូលដ្ឋានរបស់មនុស្សជាតិ សិទ្ធិលំនៅឋាន សិទ្ធិរស់នៅប្រកបដោយសេចក្តីថ្លៃថ្នូរ និងសិទ្ធិកម្មសិទ្ធិ។
នៅថ្ងៃទី១៧ កញ្ញា កងកម្លាំងចម្រុះថៃ បានបន្តរាយបន្លាលួស នៅក្នុងភូមិព្រៃចាន់ ខេត្តបន្ទាយមានជ័យ និងបានបង្ករបួសស្នាមដល់ពលរដ្ឋកម្ពុជាចំនួន ២៩អង្គនាក់។ តាមរយៈសេចក្ដីថ្លែងការណ៍ថ្កោលទោស ក្រសួងមហាផ្ទៃ បានសម្ដែងការសោកស្ដាយចំពោះទង្វើរបស់កងកម្លាំងចម្រុះថៃ មកលើប្រជាពលរដ្ឋស៊ីវិលកម្ពុជា។
ក្រសួងមហាផ្ទៃ លើកឡើងថា អំពើបង្កហេតុនេះ មិនត្រឹមតែធ្វើឱ្យ ប៉ះពាល់បូរណភាពទឹកដី អធិបតេយ្យភាពជាតិ លំនៅឋាន ដីស្រែចម្ការ និងជីវភាពរស់នៅដ៏សុខសាន្តរបស់ប្រជាពលរដ្ឋ ខ្មែរប៉ុណ្ណោះទេ ប៉ុន្តែ វាថែមទាំងជះឥទ្ធិពលអាក្រក់ដល់សណ្តាប់ធ្នាប់តំបន់ និងពិភពលោកទៀតផង។ បើតាមក្រសួងមហាផ្ទៃ នេះជាទង្វើ និងជាគំរូអាក្រក់ ដែលមនុស្សជាតិលើពិភពលោកស្អប់ខ្ពើម។
«ទង្វើរបស់ថៃ បានបំពានចូលយ៉ាងជាក់ស្តែងនៃអំពើឧក្រិដ្ឋកម្មប្រឆាំងមនុស្សជាតិ ពីព្រោះកងកម្លាំងចម្រុះថៃ បានរៀបចំអនុវត្តផែនការបង្កហេតុ រួមទាំងការធ្វើទុក្ខបុកម្នេញលើពលរដ្ឋខ្មែរ ជាពិសេសការរាយបន្លាលួសព័ទ្ធផ្ទះសំបែង ដីធ្លី ភូមិករ និងការបណ្ដេញពលរដ្ឋខ្មែរឱ្យចេញពីភូមិឋានកំណើត»។ នេះជាការលើកឡើងរបស់ក្រសួងមហាផ្ទៃ ដោយចាត់ទុកអំពើនេះ ជាការរំលោភពលើសិទ្ធិជាមូលដ្ឋានរបស់មនុស្សជាតិ សិទ្ធិលំនៅឋាន សិទ្ធិរស់នៅប្រកបដោយសេចក្តីថ្លៃថ្នូរ និងសិទ្ធិកម្មសិទ្ធិ។
ពាក់ព័ន្ធនឹងករណីនេះ ក្រសួងមហាផ្ទៃកម្ពុជា ទទូចទៅកាន់អាជ្ញាធរ និងកម្លាំងនគរបាលថៃបញ្ឈប់ជាបន្ទាន់រាល់សកម្មភាពល្មើសច្បាប់ និងងាកមកគោរពបទឈប់បាញ់ ដោយចូលរួមពង្រឹងការអនុវត្តកិច្ចព្រមព្រៀងទ្វេភាគី និងចូលរួមដោះស្រាយបញ្ហាជាមួយកម្ពុជាប្រកបដោយសន្តិវិធី៕