សមត្ថកិច្ច ដុតបំផ្លាញសាច់បង្កកខូចគុណភាពជាង ២៦តោន ដែលដកហូតពីអាជីវករនៅភ្នំពេញ

ភ្នំពេញ៖ ក្រុមអន្តរាគមន៍បង្ក្រាបបទល្មើសចលនាសត្វនៃអគ្គដ្ឋានសុខភាពសត្វ និងផលិតកម្មសត្វ បានដុតបំផ្លាញចោល «សាច់បង្កក» ខូចគុណភាពជាង ២៦តោន ដែលដកហូតបានពីទីតាំងស្តុកសាច់បង្កក ២កន្លែង និងពីរថយន្ត ១គ្រឿង នៅរាជធានីភ្នំពេញ។

លោក ហ៊ុន សារ៉ាត់ អនុ​ប្រធាន​នាយក​ដ្ឋាន​សុខភាព​សត្វ និង​សុខ​ភាព​សាធារណៈ​បសុ​ព្យាបាល បានបញ្ជាក់លើទំព័រហ្វេសប៊ុកថា សាច់បង្កកទាំងនេះ ត្រូវបានក្រុមការងាររបស់លោក សហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ ព្រមទាំង សមាគមន៍អ្នកចិញ្ចឹមសត្វកម្ពុជា ដុតកម្ទេចចោលនៅថ្ងៃទី១៨ ខែកញ្ញា នៅទីលានចាក់សំរាមខណ្ឌដង្កោ រាជធានីភ្នំពេញ។ សាច់បង្កកទាំងនោះ រួមមាន ឆ្អឹងជំនីជ្រូក, សរសៃគោ, គូទមាន់, ខ្លាញ់ជ្រូក, ស្លាបមាន់, សាច់មាន់កិន, សាច់គោ, សាច់ជ្រូក និងសរសៃជើងមាន់ សរុប ២៦ ១៦០គីឡូក្រាម។

អនុ​ប្រធាន​នាយក​ដ្ឋាន​សុខភាព​សត្វរូបនេះ មិនបានបញ្ជាក់ថា សាច់បង្កកទាំងនេះ មានប្រភពមកពីណានោះទេ។ ប៉ុន្តែ បើមើលលើព័ត៌មានដែលចាប់បានកន្លងទៅ សាច់គ្មានគុណភាពទាំងនេះ ភាគច្រើនត្រូវបានឈ្មួញនាំចូលពីប្រទេសជិតខាង ដោយគ្មានលិខិតអនុញ្ញាត៕