ករណីឆេះអគារស្នាក់នៅក្នុងទីក្រុងហុងកុង៖ មនុស្សស្លាប់កើនដល់១២៨នាក់ ហើយ២០០នាក់ នៅបន្តបាត់ខ្លួន

(ហុងកុង)៖ ប្រមុខកិច្ចការសន្តិសុខរបស់ទីក្រុងហុងកុងនៃប្រទេសចិន នារសៀលថ្ងៃសុក្រនេះ បានឱ្យដឹងថា តួលេខអ្នកស្លាប់ ក្នុងសោកនាដកម្មអគ្គិភ័យដ៏អាក្រក់បំផុត មិនធ្លាប់មានក្នុងរយៈពេលជិត ៨០ឆ្នាំ បានបន្តកើនដល់១២៨នាក់ ហើយមនុស្សប្រមាណ ២០០នាក់ផ្សេងទៀត នៅតែបាត់ខ្លួននៅឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២៨ ខែវិច្ឆិកា ឆ្នាំ២០២៥។

គ្រោះអគ្គិភ័យខាងលើបានកើតឡើង នៅតំបន់អគារអាផាតធឺមិន Wang Fuk Court ដែលមានអគារកម្ពស់៣២ជាន់សរុប៨ខ្នង ស្ថិតក្នុងខណ្ឌ Tai Po ភាគខាងជើងក្រុងហុងកុង កាលពីរសៀលថ្ងៃពុធសប្តាហ៍នេះ។ ថ្លែងក្នុងសន្និសីទសារព័ត៌មាន លោក Chris Tang ប្រមុខកិច្ចការសន្តិសុខរបស់ហុងកុង បាននិយាយដូច្នេះថា «យើងមិនច្រានចោលលទ្ធភាព ដែលថាសាកសពបន្ថែមទៀត អាចនឹងត្រូវរកឃើញ នៅពេលប៉ូលិសចូលទៅខាងក្នុងអគារ ដើម្បីធ្វើការស៉ើបអង្កេតលម្អិតនោះទេ»។

មកទល់ពេលនេះ កិច្ចប្រឹងប្រែងជួយសង្រ្គោះនិងពន្លត់អគ្គិភ័យ បានបិទបញ្ចប់ ដោយមនុស្សយ៉ាងហោច៧៩នាក់ រួមមានភ្នាក់ងារពន្លត់អគ្គិភ័យ១២នាក់ បានរងរបួស។ គ្រោះអគ្គិភ័យ banកើតឡើងចំពេលអគារទាំងនោះ ដែលជាទីជម្រករបស់​មនុស្សសរុបជាង៤៦០០នាក់ ត្រូវបានហ៊ុមព័ទ្ធដោយរន្ទាឫស្សី និងសំណាញ់បៃតង សម្រាប់ការងារកែលម្អ។

គួរបញ្ជាក់ថា បើតាមលោក Tang ប្រព័ន្ធកណ្តឹងប្រកាសអាសន្នអគ្គិភ័យ នៅក្នុងអគារមិនបានដំណើរការត្រឹមត្រូវនោះទេ នៅពេល​គ្រោះអគ្គិភ័យកើតឡើង។ ពាក់ព័ន្ធហេតុការណ៍នេះ ប៉ូលិសហុងកុងបានឱ្យដឹងថា ពួកគេបានចាប់ខ្លួនមនុស្ស៣នាក់ ធ្វើការនៅ​ក្រុមហ៊ុនសំណង់ ដែលទទួលបន្ទុកការងារកែលម្អអគារអាផាតធឺមិនខាងលើ៕