សៀវភៅ«កេរដំណែលស្នាដៃម្ហូបខ្មែរ»ទទួលបានពាន«Best of the Best–Cambodia»ពី Gourmand Awards

សៀវភៅម្ហូប «កេរដំណែលស្នាដៃម្ហូបខ្មែរ» ឬ «The Taste of Angkor» ទាំងពីរភាគ ដែល​រៀបរៀង និងដោយក្រសួងការបរទេសកម្ពុជា បានក្លាយជាម្ចាស់ជ័យលាភី «Best of the Best – Cambodia» ពីពានរង្វាន់ Gourmand Awards Best of the Best។ ពិធីប្រកាស​ជ័យលាភីនេះ ត្រូវបានធ្វើឡើងក្នុងកម្មវិធី The Saudi Feast Food Festival ដែលប្រព្រឹត្តិទៅពីថ្ងៃទី ២៧ ដល់ថ្ងៃទី៣០ ខែវិច្ឆិកា ឆ្នាំ២០២៥ នៅទីក្រុងរីយ៉ាដ ប្រទេសអារ៉ាប៊ីសាអូឌីត។

សៀវភៅ «កេរដំណែលស្នាដៃម្ហូបខ្មែរ» ភាគ១ ត្រូវបានចេញផ្សាយនៅឆ្នាំ២០២១ ខណៈ​ភាគ២ ចេញផ្សាយកាលពីឆ្នាំ២០២៥។ ភាគនីមួយៗបានបញ្ចូលមុខម្ហូប៣៨មុខ ជាមួយនឹងការរៀបរាប់ពីគ្រឿងផ្សំ វិធីចម្អិន និងរូបភាពយ៉ាងមុខម្ហូបយ៉ាងទាក់ទាញ។

សៀវភៅជាភាសាអង់គ្លេសទាំងនេះ ត្រូវបានក្រសួងចាត់ទុកជាឧបករណ៍លើកស្ទួយការទូតអាហារ (Food Diplomacy) និងជាវិធីបង្ហាញអត្តសញ្ញាណវប្បធម៌ខ្មែរទៅកាន់ពិភពលោក។

បើតាមក្រសួងការបរទេស សៀវភៅ «កេរដំណែលស្នាដៃម្ហូបខ្មែរ» ភាគ១ ទទួលបានពានរង្វាន់អន្តរជាតិចំនួន៤រួមមាន Best Asian Cookbook និង Best Asian Cuisine Book ក្នុងឆ្នាំ២០២១, Heads of State/Food ឆ្នាំ២០២២ និង Best Television Award of the Jury ឆ្នាំ២០២៣។ ចំណែកសៀវភៅ ភាគ២ ក៏ទើបនឹងទទួលបានពានរង្វាន់ Special Award of the Jury កាលពីខែមិថុនា ឆ្នាំ២០២៥ ថ្មីៗនេះ។

ក្រសួងការបរទេស បានចាត់ទុកជ័យលាភីនៃសៀវភៅទាំងពីរភាគនេះ ជាសក្ខីកម្មនៃការខិតខំប្រឹងប្រែងរបស់រដ្ឋាភិបាលកម្ពុជា ក្នុងការលើកស្ទួយកិត្យាជាតិលើឆាកអន្តរជាតិ តាមរយៈការផ្សព្វផ្សាយវប្បធម៌ ប្រពៃណី និងទំនៀមទម្លាប់ដ៏ល្អផូរផង់របស់ខ្មែរ។

គួរជម្រាបផងដែរថា Gourmand Awards Best of the Best គឺជាពានរង្វាន់កិត្តិយសថ្នាក់អន្តរជាតិ ដែលបង្កើតឡើងតាំងពីឆ្នាំ ១៩៩៥ ដើម្បីទទួលស្គាល់ស្នាដៃល្អបំផុត ក្នុងវិស័យសៀវភៅម្ហូបអាហារ ស្រា និងកម្មវិធីទូរទស្សន៍ពាក់ព័ន្ធម្ហូបអាហារ៕