កម្ពុជានឹងដាក់ឲ្យដំណើរការរោងចក្រអគ្គិសនីដើរដោយឧស្ម័ន LNGនៅចុងឆ្នាំ២០២៦នេះហើយ
ភ្នំពេញ ៖ តាមផែនការរបស់រាជរដ្ឋាភិបាល រោងចក្រអគ្គិសនីដើរដោយឧស្ម័ន LNG ដែលមានអនុភាព ៩០០ មេហ្កាវ៉ាត់ នឹងដាក់ឱ្យដំណើរការដំណាក់ទី ១ នៅចុងឆ្នាំ២០២៦ និងដំណាក់កាលទី ២ គ្រោងដាក់ឲ្យដំណើរការនៅឆ្នាំ២០២៧។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានគូសបញ្ជាក់ ក្នុងឱកាសចុះពិនិត្យវឌ្ឍនភាពដំណើរការសាងសង់រោងចក្រដើរដោយឧស្ម័ននៅស្រុកបុទុមសាគរ ខេត្តកោះកុង ថា រោងចក្រនេះនឹងដើរតួនាទីសំខាន់ក្នុងការផ្តល់អគ្គិសនីបន្ថែម ពង្រឹងសន្តិសុខថាមពលជាតិ និងពង្រឹងស្ថិរភាពឱ្យបណ្តាញអគ្គិសនីកម្ពុជា។
រោងចក្រនេះប្រើទុនវិនិយោគប្រមាណ ១.៣៥០ លានដុល្លារ នេះគឺជារោងចក្រផលិតអគ្គិសនីដើរដោយឧស្ម័នធម្មជាតិដំបូងគេបង្អស់ក្នុងប្រទេសកម្ពុជា ដែលវិនិយោគដោយក្រុមហ៊ុនក្នុងស្រុក រ៉ូយ៉ាល់ គ្រុប។
រដ្ឋមន្ត្រីក្រសួងរ៉ែនិងថាមពល បន្ថែមថា គម្រោងថាមពលអគ្គិសនីនេះមិនត្រឹមតែជានិម្មិតរូបនៃការសហការគ្នាផ្នែកពាណិជ្ជកម្មបីប្រទេស គឺកម្ពុជា ជប៉ុន និងចិននោះទេ ប៉ុន្តែក៏បង្ហាញឱ្យឃើញពីការជឿទុកចិត្ត លើការរីកចម្រើនផ្នែកសង្គម និងសេដ្ឋកិច្ចរបស់កម្ពុជា ក្រោមការដឹកនាំរបស់សម្តេចបវរធិបតីនាយករដ្ឋមន្ត្រី ហ៊ុន ម៉ាណែតផងដែរ៕
