បើករថយន្ត ឈប់ដេកតាមផ្លូវ អាវុធហត្ថទៅគោះទ្វារភ្ញាក់បើករថយន្តថយក្រោយបុករះរថយន្ត២គ្រឿង និងកិនម៉ូតូ១គ្រឿង របួសម្តាយ កូនស្រីស្លាប់
រាជធានីភ្នំពេញ ៖ យុវជនម្នាក់ បានបើករថយន្តម៉ាក BYD មួយគ្រឿង ហើយឈប់ដេកតាមផ្លូវ ត្រូវបានកម្លាំងកងរាជអាវុធហត្ថ ទៅដាស់ភ្ញាក់បើករថយន្តថយក្រោយ បុករះរថយន្តជាបន្តបន្ទាប់ ២គ្រឿង និងកិនម៉ូតូមួយគ្រឿង បណ្ដាលឲ្យជនរងគ្រោះ២នាក់ (ម្ដាយរងរបួសធ្ងន់ និងកូនបានស្លាប់ហើយនៅមន្ទីរពេទ្យ) ។
ហេតុការណ៍គ្រោះថ្នាក់នេះ បានកើតឡើងកាលវេលាម៉ោង២និង៤០នាទីរសៀលថ្ងៃទី០៧ ខែសីហា ឆ្នាំ២០២៦ នៅចំណុចស្តុប តាមផ្លូវ៥៩៨ ស្ថិតនៅភូមិ ទំនប់ សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ ។
រថយន្តដែលបង្ករគ្រោះថ្នាក់នោះ ម៉ាក BYD ពណ៌ខ្មៅ ពាក់ស្លាកលេខភ្នំពេញ ២CE-៤៨៧៤ សេរី២០២៥ បើកបរដោយយុវជនម្នាក់ឈ្មោះ ទ្រី សក្កដា ជាអ្នកសិល្បៈ និងរួមដំណើរដោយយុវជនអ្នកទៀត ។
តាមសាក្សីបានឲ្យដឹងថា នៅមុនពេលកើតហេតុគេឃើញរថយន្តមួយគ្រឿងខាងលើ បានធ្វើដំណើរតាមផ្លូវលេខ៥៩៨ នៅក្នុងទិសដៅពីជើងទៅត្បូង។ នៅពេលធ្វើដំណើរមកដល់ចំណុចស្តុប ស្រាប់តែឈប់ ហើយដេកលង់លក់។ ទោះបីជាយ៉ាងណា គេពុំដឹងថា បុរសរូបនោះមានលក្ខណៈស្រវឹង ឬយ៉ាងណានោះទេ។ ខណៈនោះអ្នកដំណើរ ក៏បានរាយការណ៍ទៅកងកម្លាំងអាវុធហត្ថ ។
តាមព័ត៌មាន បានឲ្យដឹងទៀតថា នៅពេលនោះ សមត្ថកិច្ចកងរាជអាវុធហត្ថ បានគោះទ្វារដាស់ ស្រាប់តែបុរសនោះ ក៏បានថយរថយន្តបុករះរថយន្តចំនួន២គ្រឿង រួមមាន ៖ ម៉ាក់ហាយឡេនឌ័រ មួយគ្រឿង និង toyota មួយគ្រឿង និងកិនម៉ូតូមួយគ្រឿង បណ្ដាលឲ្យស្ត្រីនិងកូនស្រី អាយុឆ្នាំ១៣ឆ្នាំ (ម្តាយបានរងរបួសធ្ងន់ កូនស្រីបានស្លាប់ហើយនៅមន្ទីរពេទ្យ) ត្រូវបានរថយន្តបញ្ជូនទៅសង្គ្រោះ។
នៅក្នុងគ្រោះថ្នាក់នោះ រថយន្តបានកិនម៉ូតូជាប់ក្រោមរថយន្ត និងថយទៅបុកឡើងចិញ្ចើមផ្លូវបុកប៉ុស្តិ៍យាម បណ្ដាលឲ្យរងការខូចខាត ហើយជាប់ទៅមុខលែងរួច។ ភ្លាមៗ បើកបររថយន្ត ត្រូវបានសមត្ថកិច្ចឃាត់ខ្លួន។ បន្ទាប់ពីកើតមានគ្រោះថ្នាក់ នគរបាលខណ្ឌសែនសុខ បានចុះទៅសម្រួលចរាចរណ៍ រួចទាក់ទងទៅនគរបាលចរាចរណ៍ផ្លូវគោក ចុះមកវាស់វែងនាំយករថយន្ត និងអ្នកបើកបរបញ្ជូនទៅកាន់ការិយាល័យ ដើម្បីដោះស្រាយសងការខូចខាត ៕
