ភ្លេចបិទទ្វារក្រោយចោរចូលលួចម៉ូតូបាត់ នគរបាលតាមរកឃើញចោរកំពុងលាងម៉ូតូ ឃាត់ខ្លួនបានម្នាក់
រាជធានីភ្នំពេញ ៖ បុរសជាជាងម៉ាស៊ីនត្រជាក់ម្នាក់ ដេកភ្លេចបិទទ្វារក្រោយ ហើយមិនបានដកសោចេញពីម៉ូតូទៀត ខណៈកំពុងដេកលង់លក់ ស្រាប់តែចោរចូលទៅលួចម៉ូតូនៅក្នុងផ្ទះបាត់។ បន្ទាប់មក នគរបាលបានតាមស្វែងរកជនសង្ស័យតាមប្រព័ន្ធតាមដានសុវត្ថិភាព GPS ដែលបំពាក់នៅលើម៉ូតូនោះ ក៏បានប្រទះឃើញលោកចោរ កំពុងលាងម៉ូតូ ដែលលួចបានក៏ឃាត់ខ្លួនតែម្ដង ។
ហេតុការណ៍ខាងលើបានកើតឡើងកាលពីវេលាម៉ោង៣ទៀបភ្លឺ ថ្ងៃទី១៩ ខែសីហា ឆ្នាំ២០២៦ នៅចំណុចផ្ទះលេខ១០៥ ផ្លូវលេខ១B បុរីឡេងណាវ៉ាត្រា ស្ថិតនៅក្នុងភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យរូបនោះឈ្មោះ សុខ រដ្ឋា ភេទប្រុស អាយុ២០ឆ្នាំ មានមុខរបរ និងទីលំនៅមិនពិតប្រាកដ បានធ្វើសកម្មភាពលួចម៉ូតូ០១គ្រឿងម៉ាកHonda ct ស៊េរីឆ្នាំ២០២៥ ពណ៍ប្រផេះ ពាក់ស្លាកលេខកម្ពុជា RUM.168 ។ ដែលម៉ូតូនេះ គឺជាកម្មសិទ្ធិរបស់បុរសម្នាក់ឈ្មោះ ទិត្យ ភារុំ អាយុ២៦ឆ្នាំ មុខរបរជាងម៉ាស៊ីនត្រជាក់ ស្នាក់នៅផ្ទះជួលក្នុងបុរីឡេងណាវ៉ាត្រា ភូមិកើតហេតុខាងលើ ។
នគរបាលបានប្រាប់ឲ្យដឹងថា នៅមុនពេលកើតហេតុ ម្ចាស់ម៉ូតូបានទុកម៉ូតូម៉ាកខាងលើនៅក្នុងផ្ទះ បន្ទាប់មកបានចូលដេកដោយមិនបានបិទទ្វារផ្ទះខាងក្រោយនោះទេ រួចក៏ដេកលង់លក់ដោយមិនដឹងខ្លួន។ ខណៈនោះលោកចោរ បានជិះកង់ ១គ្រឿង ទៅឈប់ជិតនោះ រួចចូលតាមទ្វារក្រោយលួចម៉ូតូទៅបាត់ រហូតដល់វេលាម៉ោង៣ទៀបភ្លឺ ទើបដឹងថា បាត់ម៉ូតូ លុះព្រឹកឡើងបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី១ ។
នគរបាល បានប្រាប់ឲ្យដឹងបន្តទៀតថា ម៉ូតូនោះ ម្ចាស់អត់បានដកសោទុកនោះទេ ទើបលោកចោរលួចយកបានដោយស្រួល ហើយក្រោយពេលទទួលបានបណ្ដឹងពីម្ចាស់ម៉ូតូ កម្លាំងប៉ុស្តិ៍នគរបាលរដ្ឋបាលចោមចៅទី១ និងនគរបាលខណ្ឌពោធិ៍សែនជ័យ បានបើកការស្រាវជ្រាវ និងស្វែងរកម៉ូតូព្រមទាំងជនសង្ស័យតាមប្រព័ន្ធតាមដានសុវត្ថិភាព GPS ដែលបំពាក់នៅលើម៉ូតូខាងលើ ។ ពេលនោះ ប្រព័ន្ធ GPS បានចង្អុលបង្ហាញទិសដៅជនសង្ស័យនៅតាមផ្លូវជាតិលេខ២ និងលេខ៣ រហូតដល់ភូមិសាស្ត្រស្រុកសំរោងទង ខេត្តកំពង់ស្ពឺ ហើយកម្លាំងនគរបាល ក៏បានទៅតាមការចង្អុលបង្ហាញរបស់ប្រព័ន្ធ GPS នោះ ហើយពេលទៅដល់គោលដៅទាំងអស់ខាងលើ ស្រាប់តែជនសង្ស័យគេចត្រលប់ក្រោយចូលរាជធានីភ្នំពេញវិញ ។
នគរបាល បានប្រាប់ឲ្យដឹងបន្តទៀតថា កម្លាំងនគរបាល ក៏បានតាមជាប់រហូតគ្រប់គោលដៅទាំងអស់ ដែលជនសង្ស័យទៅ ហើយចុងក្រោយបានសហការជាមួយកម្លាំងអធិការដ្ឋាននគរបាលខណ្ឌទួលគោក រកឃើញជនសង្ស័យឈ្មោះ សុខ រដ្ឋា កំពុងលាងម៉ូតូ នៅផ្ទះជីតារបស់ខ្លួន ស្ថិតនៅម្ដុំផ្សារឃ្លាំងរំសេវ សង្កាត់ទឹកល្អក់ ខណ្ឌទួលគោក រាជធានីភ្នំពេញ ក៏ឃាត់ខ្លួនរួមទាំងម៉ូតូ បន្ទាប់មកនាំទៅកាន់អធិការដ្ឋាននគរបាលខណ្ឌពោធិ៍សែនជ័យ ដើម្បីសាកសួរ និងកសាងសំណុំរឿងចាត់ការតាមច្បាប់ ៕
