ម៉ាឡេស៊ីប្រកាសអាសន្ន នៅតំបន់មួយក្នុងរដ្ឋ Sarawak ដោយសារផ្សែងអ័ព្ទពុលពីភ្លើងឆេះព្រៃ នៅឥណ្ឌូណេស៊ី
ប្រទេសម៉ាឡេស៊ីបានប្រកាសអាសន្ននៅក្នុងស្រុក Serian នៃរដ្ឋ Sarawak កាលពីថ្ងៃសុក្រ បន្ទាប់ពីអ័ព្ទក្រាស់ពាក់ព័ន្ធនឹងភ្លើងឆេះព្រៃ និងដី peatland ក្នុងប្រទេសឥណ្ឌូណេស៊ីដែលជាប្រទេសជិតខាង បង្កឱ្យការបំពុលខ្យល់ឡើងដល់កម្រិតគ្រោះថ្នាក់។
នាយករដ្ឋមន្ត្រីម៉ាឡេស៊ី លោក Anwar Ibrahim និយាយក្នុងសេចក្តីថ្លែងការណ៍មួយលើបណ្តាញសង្គម X ថា៖ « ព្រះមហាក្សត្រ Sultan Ibrahim របស់ប្រទេសម៉ាឡេស៊ី បានអនុម័តសេចក្តីប្រកាសអាសន្នអំពីបញ្ហានេះ»។
លោកបន្ថែមថា៖ « រដ្ឋាភិបាលនឹងបន្តតាមដានការវិវត្ត និងធានាថាសកម្មភាពចាំបាច់ទាំងអស់ត្រូវបានអនុវត្តយ៉ាងឆាប់រហ័ស រួមទាំងវិធានការកាត់បន្ថយ ក៏ដូចជាការផ្សព្វផ្សាយព័ត៌មាន និងដំបូន្មានសុខភាពដល់សាធារណជន»។
សន្ទស្សន៍បំពុលខ្យល់(API) ក្នុងស្រុក Serian បានកើនឡើងលើសពីកម្រិត ៥០០ កាលពីថ្ងៃសុក្រ លើសពីកម្រិតប្រកាសអាសន្ន។
គួរបញ្ជាក់ថា អាជ្ញាធរម៉ាឡេស៊ីចាត់ថ្នាក់សន្ទស្សន៍ខ្យល់លើសពី ៣០០ ថាមានគ្រោះថ្នាក់។
រដ្ឋ Sarawak ខាងប្រទេសម៉ាឡេស៊ីនៃកោះ Borneo បានរងផលប៉ះពាល់យ៉ាងខ្លាំងដោយផ្សែងពីភ្លើងឆេះព្រៃ និងដី peatland ក្នុងតំបន់ Kalimantan របស់ប្រទេសឥណ្ឌូណេស៊ី។
ប្រទេសម៉ាឡេស៊ីកាលពីថ្ងៃព្រហស្បតិ៍នេះបានចាប់ផ្តើមប្រតិបត្តិការសាបព្រួសពពករយៈពេល ៣ថ្ងៃ នៅរដ្ឋ Sarawak ដើម្បីបំពេញកម្រិតទឹកទំនប់ និងបន្ធូរបន្ថយអ័ព្ទ។
ការសាបព្រួសពពកពាក់ព័ន្ធនឹងការបំបែកភាគល្អិតចូលទៅក្នុងពពកសមស្រប ដើម្បីជំរុញឱ្យមានភ្លៀងធ្លាក់។
ប្រទេសឥណ្ឌូណេស៊ីក៏បានអនុវត្តប្រតិបត្តិការសាបព្រួសពពកដែរ ខណៈប្រទេសនេះកំពុងប្រយុទ្ធប្រឆាំងនឹងភ្លើងឆេះព្រៃ និងដីព្រៃដែលរីករាលដាលយ៉ាងទូលំទូលាយ។
អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី លោក Berton Panjaitan ប្រាប់ទីភ្នាក់ងារ Anadolu កាលពីថ្ងៃសុក្រថា ប្រតិបត្តិការត្រូវបានធ្វើឡើងចាប់ពីថ្ងៃទី២៦ ខែសីហា ដល់ថ្ងៃទី០២ ខែកញ្ញា ដើម្បីប្រើប្រាស់ទឹកភ្លៀងដែលមាន បង្កើនសំណើមនៅក្នុងដី និងដីព្រៃ ទប់ស្កាត់ភ្លើងឆេះដែលមានស្រាប់ និងការពារភ្លើងឆេះថ្មី។
លោកលើកឡើងថា៖ « ប្រទេសឥណ្ឌូណេស៊ីបានដាក់ពង្រាយយន្តហោះសរុបចំនួន ៣៤គ្រឿង ដើម្បីគាំទ្រដល់ប្រតិបត្តិការសាបព្រួសពពក ឬ Operasi Modifikasi Cuaca (OMC) នៅក្នុងតំបន់អាទិភាពផ្សេងៗគ្នា»៕
