លោក ញ៉ែម សំអឿន អភិបាលខេត្តរតនគិរី បានប្រកាសពីគម្រោងប្រែក្លាយ «តំបន់បឹងកន្សែង» នៅក្នុងក្រុងបានលុង ទៅជាផ្លូវថ្មើរជើង ដូចនឹងផ្លូវថ្មើរជើងចតុមុខ នៅភ្នំពេញដែរ។ លោក ញ៉ែម សំអឿន ថ្លែងប្រាប់សារព័ត៌មានឌីជីថលថ្មីៗបន្ថែមតាមទូរសព្ទថា «គម្រោងផ្លូវថ្មើរជើងនៅជុំវិញបឹងកន្សែង»នេះ មានប្រវែង ជាង២ ០០០ម៉ែត្រ ហើយវានឹងលេចជារូបរាងឡើងនៅចុងឆ្នាំ២០២៥នេះ។
បើតាមលោកអភិបាលខេត្តរតនគិរី បច្ចុប្បន្ន ក្រុមការងារ បានរៀបចំកែលម្អហេដ្ឋារចនាសម្ព័ន្ធនៅជុំវិញបឹងកន្សែងបានស្អាត ប៉ុន្តែមិនទាន់បាន១០០ភាគរយនៅឡើយ។ ដ្បិតមិនទាន់ក្លាយជាផ្លូវថ្មើរជើង Walk Street ផ្លូវការ ប៉ុន្តែសព្វថ្ងៃ នៅជុំវិញបឹងកន្សែងមានប្រជាពលរដ្ឋ និងទេសចរ មកដើរកម្សាន្ត និងហាត់ប្រាណនៅតាមបណ្ដោយផ្លូវបឹងកន្សែង ច្រើនកុះករដែរ។
អាជ្ញាធរខេត្តបានកែលម្អសោភ័ណភាព និងភ្លើងបំភ្លឺ ធានាសុវត្ថិភាព និងសន្តិសុខសម្រាប់អ្នកមកកម្សាន្ត។ លើសពីនេះ ទេសចរខ្លះថតរូបលេង ជាមួយរូបសំណាកដំរី និងអក រួមទាំងខ្សែរ៉កផងដែរ។ នេះបើតាមលោក ញ៉ែម សំអឿន ដោយលោកបានបន្ថែមថា៖«ក្រោយលើកសម្រស់បឹងកន្សែង ប្រជាពលរដ្ឋ និងទេសចរសប្បាយចិត្ត ចំពោះការរៀបចំនៅជុំវិញបឹងនេះ។ យើងនឹងបង្ហើយការរៀបចំការ៉ូឡាឱ្យបានស្អាត»។
ពាក់ព័ន្ធរឿងនេះ កាលពីថ្ងៃទី៣ ខែកក្កដា សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ក៏បានលើកទឹកចិត្ត ឱ្យខេត្តនីមួយៗប្រកួតគ្នា ក្នុងការបង្កើនសោភ័ណភាពនៅទីសាធារណៈនេះ ហើយក៏ចង់ខេត្តទាំងនោះ រៀបចំ និងបង្កើនសោភ័ណភាពសួនច្បារ និងកន្លែងកម្សាន្តសាធារណៈប្រជែងជាមួយ«ផ្លូវថ្មើរជើងចតុមុខ-Walk Street»ទៀតផង។
ពាក់ព័ន្ធនឹងសក្តានុពលទេសចរណ៍នៅរតនគិរី ក៏ត្រូវបានកត់សម្គាល់ថាកំពុងមានកំណើន ពីលោក ហួត ហាក់ រដ្ឋមន្រ្តីក្រសួងទេសចរណ៍ដែរ។
ថ្លែងក្នុងព្រឹត្តិការណ៍ «សម្លចាណាងឆ្នាំងយក្ស» ឆ្នាំ២០២៥ នៅខេត្តរតនគិរី កាលពីថ្ងៃទី៣០ មិថុនារដ្ឋមន្រ្តីក្រសួងទេសចរណ៍ ថែមទាំងបាន គាំទ្រ និងលើកទឹកចិត្តដល់អភិបាលខេត្ត ប្រែក្លាយតំបន់បឹងកន្សែងក្នុងក្រុងបានលុង ទៅជាផ្លូវថ្មើរជើង ដូចរាជធានីភ្នំពេញដែរ។
«បឹងកន្សែង»ជាបេះដូងនៃក្រុងបានលុង ក្នុងខេត្តរតនគិរី។ បឹងនេះ មានសួនច្បារ និងទីធ្លាសម្រាប់ពលរដ្ឋ រួមទាំងទេសចរដើរកម្សាន្ត។ លោក ហួត ហាក់ រដ្ឋមន្រ្តីក្រសួងទេសចរណ៍ បានបង្ហាញការចាប់អារម្មណ៍ពីបរិស្ថាន និងសោភ័ណភាពដ៏ស្រស់ស្អាតរបស់បឹងកន្សែង ក្រោយរដ្ឋបាលខេត្តរៀបចំយ៉ាងមនោរម្យ។
«ពិសេសនៅមាត់បឹងកន្សែងនេះ ឃើញមានភាពមនោរម្យណាស់ បៃតងក៏បៃតង ទឹកបឹងក៏ស្អាត សណ្ដាប់ធ្នាប់ក៏ល្អ។»។ នេះជាការលើកឡើងរបស់លោក ហួត ហាក់ ដោយគាំទ្រ និងលើកទឹកចិត្តដល់លោក ញ៉ែម សំអឿន អភិបាលខេត្តរតនគិរី ដើម្បីប្រែក្លាយតំបន់បឹងកន្សែងនេះ ទៅជា Walk Streetរបស់ខេត្តរតនគិរី ដូចរាជធានីភ្នំពេញ។
សម្រាប់រដ្ឋមន្រ្តីក្រសួងទេសចរណ៍ ប្រសិនបើតំបន់នេះ ក្លាយជា Walk Street នោះនឹងក្លាយជាលំដាប់ទី២ បន្ទាប់ពីរាជធានីភ្នំពេញ និងមុនគេ ក្នុងចំណោមខេត្តដទៃ។ ជុំវិញការលើកទឹកចិត្តរបស់លោក ហួត ហាក់ រដ្ឋមន្រ្តីទេសចរណ៍ ជាជំហានមួយដែលរដ្ឋបាលខេត្តរតនគិរី បានគិតគូររួចមកហើយ៕