ប្រធានាធិបតីអាមេរិក លោក ដូណាល់ ត្រាំ បានជំរុញឲ្យនាយករដ្ឋមន្ត្រីជប៉ុន លោកស្រី Sanae Takaichi កុំបង្កជម្លោះជាមួយទីក្រុងប៉េកាំងលើបញ្ហាតៃវ៉ាន់
កាសែត The Wall Street Journal (WSJ) បានរាយការណ៍កាលពីថ្ងៃពុធទី២៦ខែវិច្ឆិកាឆ្នាំ២០២៥ថា ប្រធានាធិបតីអាមេរិក លោក ដូណាល់ ត្រាំ បានជំរុញឲ្យនាយករដ្ឋមន្ត្រីជប៉ុន លោកស្រី Sanae Takaichi កុំបង្កជម្លោះជាមួយទីក្រុងប៉េកាំងលើបញ្ហាតៃវ៉ាន់ អំឡុងពេលហៅទូរសព្ទក្នុងសប្តាហ៍នេះ។
សេចក្តីរាយការណ៍ដដែលនេះ បានឲ្យដឹងថា ការហៅទូរសព្ទរបស់លោកត្រាំ ធ្វើឡើងបន្ទាប់ពីការពិភាក្សាជាមួយប្រធានាធិបតីចិន លោក ស៊ី ជីនពីង ដែលបានលើកឡើងជាថ្មីម្តងទៀតនូវការទាមទារជាប្រវត្តិសាស្ត្ររបស់ចិនលើកោះតៃវ៉ាន់ និងបានសង្កត់ធ្ងន់លើទំនួលខុសត្រូវរួមគ្នារបស់ទីក្រុងវ៉ាស៊ីនតោន និងទីក្រុងប៉េកាំងក្នុងការគ្រប់គ្រងស្ថិរភាពពិភពលោក។
លោកស្រី Takaichi បានបង្កប្រតិកម្មផ្នែកការទូតកាលពីដើមខែវិច្ឆិកា បន្ទាប់ពីបានលើកឡើងថា ជប៉ុនអាចនឹងធ្វើអន្តរាគមន៍យោធា ប្រសិនបើចិនវាយប្រហារតៃវ៉ាន់។ យោងតាមកាសែត WSJ ដំបូន្មានរបស់លោកត្រាំ ត្រូវបានផ្តល់ឲ្យដោយប្រយោល និងមិនបានដាក់សម្ពាធលើលោកស្រីឲ្យដកសម្ដីរបស់ខ្លួនវិញនោះឡើយ។
សូមជម្រាបថា ថ្មីៗនេះ ចិនបានចោទប្រកាន់ជប៉ុនថា មានចេតនាបង្កើនភាពតានតឹងក្នុងតំបន់ បន្ទាប់ពីទីក្រុងតូក្យូបាននិយាយថា ខ្លួននឹងបន្តផែនការដាក់ពង្រាយមីស៊ីលបាញ់ពីដីទៅអាកាសនៅលើកោះយ៉ូណាហ្គូនី (Yonaguni) ដែលជាកោះមួយស្ថិតនៅចម្ងាយប្រហែល១១០គីឡូម៉ែត្រភាគខាងកើតកោះតៃវ៉ាន់។ យ៉ាងណាមិញ ទីក្រុងតូក្យូអះអាងថា ការដាក់ពង្រាយនេះគឺចាំបាច់ដើម្បីការពារកោះយ៉ូណាហ្គូនី និងអាចជួយទប់ស្កាត់ជម្លោះបាន៕