ជនជាតិចិន ឆ្លងដែនខុសច្បាប់ចូលដីថៃ ជួបគ្រោះថ្នា./ក់ជាន់មីនរងរបួសជើងធ្ងន់ធ្ងរ នៅបានណង់ចាន់
នៅថ្ងៃទី ២៩ ខែវិច្ឆិកា ឆ្នាំ ២០២៥ នេះ កងទ័ពភូមិភាគទី១ តាមរយៈមជ្ឈមណ្ឌលប្រតិបត្តិការតំបន់កងទ័ពជើងគោកទី១ បានទទួលរបាយការណ៍ពីកងកម្លាំង Burapha ថា មានមនុស្សម្នាក់បានឆ្លងដែនខុសច្បាប់ចូលទឹកដីថៃ ហើយបានជាន់មីនបណ្តាលឱ្យរងរបួស។
តាមការត្រួតពិនិត្យ បានរកឃើញថា នៅថ្ងៃទី ២៩ ខែវិច្ឆិកា ឆ្នាំ២០២៥ វេលាម៉ោង ៥ និង ៥០នាទីព្រឹក មន្ត្រីនគរបាលល្បាតព្រំដែន (BPP) មកពីក្រុមប្រតិបត្តិការពិសេស BPP ទី៤ បានឮសំឡេងផ្ទុះនៅតំបន់ព្រៃក្រាស់ ចម្ងាយប្រហែល ៨០-៩០ ម៉ែត្រ ពីផ្លូវ Si Phen។ ដូចនេះ ក្រុមការងារទី ១២ ក៏បានដាក់បង្ហោះដ្រូន ដើម្បីត្រួតពិនិត្យ និង ស្ទាបស្ទង់មើលស្ថានការណ៍។
ពួកគេក៏ប្រទះឃើញ បុរសជនជាតិចិនម្នាក់រងរបួសសង្ស័យថាបានជាន់មីនហើយស្រែកហៅឱ្យជួយជាភាសាអង់គ្លេស។ ភ្លាមៗ ក្រុមកម្ចាត់មីនដែលដឹកនាំដោយអង្គភាពកម្ចាត់មីនមនុស្សធម៌ទី ១ (HDU 1) ត្រូវបានបញ្ជូនទៅធ្វើការជួយសង្គ្រោះបន្ទាន់។
មន្ត្រីយោធា និង មន្ត្រី BBP បានចុះការពារទីតាំងនោះដើម្បីការពារសុវត្ថិភាព ហើយអ្នករបួសក៏ត្រូវបានបញ្ជូនទៅកាន់មន្ទីរពេទ្យ Khok Sung សង្កាត់ Khok Sung ខេត្តស្រះកែវ។
តាមការពិនិត្យបន្ថែមលើលិខិតឆ្លងដែន បានរកឃើញថា ជនរងគ្រោះជាជនជាតិចិន អាយុ ២៦ ឆ្នាំ មកពីខេត្ត Yunan បានរងរបួសជើងខាងស្តាំធ្ងន់ធ្ងរ។ តាមការសង្ស័យ ជនជាតិចិនរូបនេះបានឆ្លងដែនខុសច្បាប់ចូលទៅថៃ។ គួរឱ្យដឹងថា ទីតាំងកើតហេតុជាតំបន់មានមីននៅ Ban Nong Chan ដែលខាងថៃនៅធ្វើប្រតិបត្តិការដោះមីននៅឡើយ។
ជាមួយគ្នានោះ ខាងកម្លាំងការិយាល័យទី ១២ បានសម្របសម្រួលជាមួយនគរបាលអន្តោប្រវេសន៍ខេត្តស្រះកែវ ដើម្បីចាត់ការបន្តតាមនីតិវិធីច្បាប់៕
ប្រភព៖ Khaosod English
