ហុងកុង ប្រកាសកាន់ទុក្ខ ៣ ថ្ងៃ ក្នុងសោកនាដកម្មភ្លើងឆេះដ៏អាក្រក់ សម្លា-/ប់ជី-វិតមនុស្សអស់រាប់រយនាក់

ទីក្រុងហុងកុង ប្រទេសចិន បានប្រកាសការកាន់ទុក្ខរយៈពេល ៣ ថ្ងៃ ក្រោយកើតមានសោកនាដកម្មអគ្គិភ័យដ៏អាក្រក់មិនធ្លាប់មានរាប់សិបឆ្នាំ បណ្ដាលឱ្យមនុស្សយ៉ាងហោចណាស់ ១២៨ នាក់បាត់បង់ជីវិត និង ប្រមាណ ២០០ នាក់ផ្សេងទៀតនៅបាត់ខ្លួននៅឡើយ។

រដ្ឋាភិបាលតំបន់រដ្ឋបាលពិសេសហុងកុង (HKSAR) បានធ្វើការប្រកាសថា ហុងកុងនឹងចាប់ផ្ដើមធ្វើការកាន់ទុក្ខរយៈពេល ៣ ថ្ងៃ ចាប់ពីថ្ងៃទី ២៩ ខែវិច្ឆិកា ឆ្នាំ ២០២៥ នេះតទៅ ដើម្បីកាន់ទុក្ខដល់ជនរងគ្រោះដែលបានស្លាប់ក្នុងគ្រោះអគ្គិភ័យ។ ទង់ជាតិនឹងបង្ហូតមកត្រឹមពាក់ កណ្ដាលនៅការិយាល័យ និង អគាររដ្ឋាភិបាលរហូតដល់ថ្ងៃទី ០១ ខែធ្នូ ឆ្នាំ ២០២៥ ខាងមុខ។ ក្នុងអំឡុងពេលកាន់ទុក្ខនេះ សកម្មភាពសាធារណៈមិនចាំបាច់នានាក៏ត្រូវបានលុបចោលផងដែរ។

គួររំឭកថា បណ្ដុំអគារ Wang Fuk Court ដែលមានប្រមាណ ២ ពាន់អាផាតមិន បានកើតអគ្គិភ័យនៅវេលាម៉ោងប្រមាណ ២ និង ៥១ នាទីថ្ងៃត្រង់ ថ្ងៃទី ២៦ ខែវិច្ឆិកា ឆ្នាំ ២០២៥ កន្លងទៅ (ពេលវេលាក្នុងតំបន់)។ ភ្លើងឆាបឆេះងំរយៈពេលដល់ ៤០ ម៉ោង រាលដាលពាសពេញអគារ ៧-៨ ខ្នងជាប់គ្នា។

អគ្គិភ័យនេះដែរ បានសម្លាប់មនុស្ស ១២៨ នាក់ និង ប្រមាណ ២០០ នាក់ទៀតនៅបាត់ខ្លួននៅឡើយ។ អាជ្ញាធរហុងកុង ព្រមានថាចំនួនអ្នកស្លាប់អាចនឹងកើនឡើងទៀត ខណៈក្រុមសង្គ្រោះនៅបន្តរុករកពីអាផាតមិនមួយទៅអាផាតមិនមួយ៕