ការព្យាករអំពីភ្លៀងធ្លាក់ បង្កការភ័យខ្លាចពីគ្រោះមហន្តរាយធម្មជាតិថែមទៀត នៅឥណ្ឌូណេស៉ី និងស្រីលង្កា

(កូឡុំបូ, ហ្សាការតា)៖ ភ្លៀងធ្លាក់ខ្លាំងជាថ្មីត្រូវបានព្យាករណ៍ សម្រាប់ឥណ្ឌូណេស៉ី និងស្រីលង្កា នាថ្ងៃព្រហស្បតិ៍ ទី៤ ខែធ្នូនេះ នាំឱ្យមានការភ័យខ្លាចពីការបំផ្លិចបំផ្លាញថែមទៀត ដោយគ្រោះទឹកជំនន់ដែលបានឆក់យកជីវិតមនុស្ស សរុបជាង ១ ០០០នាក់រួចមកហើយ នៅក្នុងប្រទេសទាំងពីរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ទីភ្នាក់ងារឧតុនិយឥណ្ឌូណេស៉ី បានព្រមានថា ខេត្តចំនួន ៣ដែលគ្រោះខ្លាំងជាងគេ នៅកោះ Sumatra អាចនឹងមានភ្លៀងធ្លាក់ខ្លាំងចន្លោះពីថ្ងៃព្រហស្បតិ៍ ដល់ថ្ងៃសុក្រសប្តាហ៍នេះ។ ភ្លៀងធ្លាក់បានចាប់ផ្តើមកាលពីយប់មិញ ប៉ុន្តែមកដល់ពេលនេះ មិនទាន់ឈានដល់កម្រិតខ្លាំងក្លាមុននៅឡើយទេ។ នៅឥណ្ឌូណេស៉ី មនុស្សជាង ៥៦០នាក់ នៅតែបាត់ខ្លួន បន្ទាប់ពីទឹកជំនន់ និងបំណាក់ដីវាយប្រហារកាលពីសប្តាហ៍ ខណៈការដាច់បណ្តាញទំនាក់ទំនង និងចរន្តអគ្គិសនី ធ្វើឱ្យពិបាកក្នុងការតាមរក។ អ្នកស្នាក់នៅជម្រកបណ្តោះអាសន្នម្នាក់និយាយថា នាង​​មិនទាន់បាត់ភ័យ​តក់​ស្លុតទេ ពេល​ដែលឃើញទឹក​ជំនន់ហូរច្រោះផ្ទះ​របស់​នាង។

នៅប្រទេសស្រីលង្កា អ្នកឧតុនិយមនិយាយថា ខ្យល់មូសុងឦសាន នឹងមកដល់ចាប់ពីរសៀលថ្ងៃព្រហស្បតិ៍នេះ។ ការជូនដំណឹងអំពីបំណាក់ដី នៅតែបន្តសម្រាប់តំបន់មួយចំនួន នៃតំបន់ដែលរងគ្រោះខ្លាំងបំផុតនៅភាគកណ្តាល ហើយអ្នកស្រុកត្រូវបានណែនាំមិនឱ្យត្រឡប់ទៅផ្ទះវិញទេ ពីព្រោះទីជម្រាលស្រាប់ អាចបាក់រលំពេលដែលមានភ្លៀងខ្លាំង។ មនុស្សយ៉ាងតិច ៤៧៩នាក់បានស្លាប់នៅក្នុងប្រទេសស្រីលង្កា ហើយរាប់រយនាក់នៅតែបាត់ខ្លួន ខណៈប្រធានាធិបតីបានអំពាវនាវរកជំនួយពីអន្តរជាតិ៕