សហភាពអឺរ៉ុបរំពឹងថា សហរដ្ឋអាមេរិកនឹងគោរពកិច្ចព្រមព្រៀងពាណិជ្ជកម្មកាលពីឆ្នាំមុន ក្រោយលោក ត្រាំ ប្រកាសពន្ធគយថ្មី បន្ទាប់ពីសេចក្តីសម្រេចរបស់តុលាការកំពូល

(ព្រុចសែល)៖ កាលពីថ្ងៃអាទិត្យ ទី២២ ខែកុម្ភៈ គណៈកម្មការអឺរ៉ុប បានទាមទារ​ឱ្យអាមេរិកគោរពកិច្ចព្រមព្រៀងពាណិជ្ជកម្ម រវាងសហភាពអឺរ៉ុប (EU) និងសហរដ្ឋអាមេរិក ដែលភាគីទាំងពីរសម្រេចបានកាលពីឆ្នាំមុន បន្ទាប់ពីតុលាការកំពូលអាមេរិក បានលុបចោលពន្ធគយសកល ដែលប្រធានាធិបតីអាមេរិក លោក ដូណាល់ ត្រាំ បានដាក់ចេញកន្លងមក ហើយរូបលោកបានឆ្លើយតបវិញ តាមរយៈការប្រកាសពន្ធគយថ្មីផ្សេងទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

គណៈកម្មការអឺរ៉ុប ដែលចរចាគោលនយោបាយពាណិជ្ជកម្ម ជំនួសមុខឱ្យរដ្ឋជាសមាជិកទាំង២៧ របស់ EU បាននិយាយថា ទីក្រុងវ៉ាស៉ីនតោនចាំបាច់ត្រូវផ្តល់ការបកស្រាយឱ្យច្បាស់លាស់ ស្តីពីជំហានបន្ទាប់របស់ខ្លួន ក្រោយសេចក្តីសម្រេចរបស់តុលាការកំពូលអាមេរិក។ បន្ទាប់ពីត្រូវតុលាការកំពូល សម្រេចលុបចោលពន្ធគយសកលរបស់លោក លោក ត្រាំ បានប្រកាសពន្ធគយថ្មីដែលមានលក្ខណៈបណ្តោះអាសន្ន ក្នុងអត្រា១០ភាគរយ លើគ្រប់មុខទំនិញនាំចូលទាំងអស់ ហើយមួយថ្ងៃក្រោយមក លោកបានដំឡើងដល់ ១៥ភាគរយ។

គួរបញ្ជាក់ថា កិច្ចព្រមព្រៀងពាណិជ្ជកម្មកាលពីឆ្នាំ២០២៥ បានកំណត់ពន្ធគយអាមេរិកក្នុងអត្រា១៥ភាគរយ​ សម្រាប់ទំនិញភាគច្រើនរបស់ EU ហើយក៏បានអនុញ្ញាតការយកពន្ធសូន្យ លើផលិតផលមួយចំនួន ដូចជាយន្តហោះ និងគ្រឿងបន្លាស់យន្តហោះផងដែរ។ ក្រោមកិច្ចព្រមព្រៀងនោះ EU បានយល់ព្រមលុបចោលពន្ធនាំចូល លើទំនិញអាមេរិកជាច្រើន ហើយដកថយវិញនូវការគំរាមដំឡើងពន្ធខ្ពស់ ដើម្បីសងសឹក។ បើតាមគណៈកម្មការអឺរ៉ុប ស្នងការទទួលបន្ទុកពាណិជ្ជកម្មរបស់ EU លោក Maros Sefcovic បានពិភាក្សាអំពីបញ្ហាខាងលើ ជាមួយប្រធានតំណាងពាណិជ្ជកម្មអាមេរិក លោក Jamieson Greer និងរដ្ឋមន្រ្តីពាណិជ្ជកម្មអាមេរិក លោក Howard Lutnick កាលពីថ្ងៃសៅរ៍ចុងសប្តាហ៍កន្លងទៅនេះ៕