សៀមរាប៖កំណើនភ្ញៀវទេសចរបរទេសមកទស្សនាកម្ពុជាក្រោយឆ្លងផុតពីការរីក រាលនៃជំងឺកូវីដ-១៩ គឺជាសញ្ញាដ៏ល្អបង្ហាញពីសក្តានុពល និងភាពធន់រឹងមាំ នៃវិស័យ ទេសចរណ៍នៅកម្ពុជា និងក្នុងតំបន់អាស៊ានទាំងមូល។នេះជាការបញ្ជាក់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ក្នុងពិធីបើកសិក្ខាសាលាថ្នាក់តំបន់ ស្តីពីការកសាងសមត្ថភាពអ្នកវាយតម្លៃបង្គោលអាស៊ាន ស្ដីពីការវាយតម្លៃលើ ការ សិក្សាពីមុននៃអ្នកជំនាញទេសចរណ៍អាស៊ាន នៅខេត្តសៀមរាបកាលពីថ្ងៃទី១៥ ខែកក្កដា ឆ្នាំ២០២៥។
ឯកឧត្ដមរដ្ឋមន្រ្តីបន្តថា ទោះបីជាស្ថានការណ៍អន្តរជាតិស្ថិតនៅក្នុងភាពតានតឹង និងមានវិបត្តិនានា ដូចជាសង្គ្រាមនៅមជ្ឈិមបូព៌ា វិបត្តិពាណិជ្ជកម្ម និងភាពមិនច្បាស់ លាស់នៃភូមិសាស្ត្រនយោបាយ ក៏ដោយ តែចំនួនភ្ញៀវទេសចរដែលមកកម្ពុជានិង តំបន់អាស៊ាន នៅតែបន្តកើនឡើង។ឯកឧត្តមបន្តថា កត្តាចម្បងនៃការរីក ចម្រើន ទាំងនេះ គឺដោយសារសន្តិភាព និងស្ថិរភាពក្នុងប្រទេស ក៏ដូចជាការអនុវត្តយុទ្ធសាស្ត្រ លើវិស័យទេសចរណ៍ដោយសកម្មភាពរួមគ្នា ពីគ្រប់ភាគីពាក់ព័ន្ធ ក្នុងចំណោមនោះ រួមទាំងការសម្រេចផែនការដ៏ច្បាស់លាស់ និងអនុវត្តន៍ដោយភាពធន់រឹងនិងនិរន្តរភាព ផងដែរ។
សូមជម្រាបថា តាមស្ថិតិ ឆ្នាំ២០២៤ តំបន់អាស៊ានទទួលបានភ្ញៀវទេសចរជាង១២៣ លាននាក់ កើនឡើង ៣០.៦ភាគរយបើប្រៀបធៀបនឹងឆ្នាំ២០២៣ ខណៈកម្ពុជា ទទួលភ្ញៀវអន្តរជាតិ ៦.៧ លាននាក់ និងភ្ញៀវជាតិប្រមាណ ២២.៥២ លាននាក់។
ដោយឡែកសម្រាប់សម្រាប់ឆមាសទី១ ឆ្នាំ២០២៥ កម្ពុជាទទួលបានភ្ញៀវអន្តរជាតិ ប្រមាណ ៣.៣៦ លាននាក់ កើន ៦ភាគរយ និងភ្ញៀវជាតិ ១៤.៥៧ លាននាក់កើន ៥០ភាគរយ បើប្រៀបនឹងរយៈពេលដូចគ្នានៃឆ្នាំមុន៕
