លោក ម៉ាក្រុង៖ គ្មានអ្វីបង្ហាញពីភាពត្រឹមត្រូវរបស់អ៊ីស្រាអែល បន្តវាយលីបង់រាល់ថ្ងៃនោះទេ
មានបទឈប់បាញ់ក៏ហាក់បីដូចជាគ្មានសម្រាប់លីបង់និងអ៊ីស្រាអែល ព្រោះតែយោធាអ៊ីស្រាអែលតែងតែវាយប្រហារមកលើប្រទេសលីបង់មិនលស់ថ្ងៃ គិតមកដល់ថ្ងៃនេះ ដោយយកលេសតាមប្រហារក្រុមហេសបូឡាដែលគាំទ្រដោយអ៊ីរ៉ង់។
ដោយមើលឃើញពីភាពមិនធូរស្បើយរវាងប្រទេសទាំងពីរ ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) លើកឡើងកាលពីថ្ងៃអាទិត្យ ថា គ្មានអ្វីដែលអាចបង្ហាញពីភាពត្រឹមត្រូវរបស់អ៊ីស្រាអែល ចំពោះការវាយប្រហារជាបន្តបន្ទាប់ នៅភាគខាងត្បូងប្រទេសលីបង់នោះទេ។ នេះបើយោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី៣១ ខែឧសភា ឆ្នាំ២០២៦ ។
លោក ម៉ាក្រុង បានសរសេរបង្ហោះលើបណ្តាញសង្គម X ថា៖ « គ្មានអ្វីអាចបង្ហាញពីភាពត្រឹមត្រូវនៃការវាយប្រហារជាបន្តបន្ទាប់ នៅភាគខាងត្បូងប្រទេសលីបង់នោះទេ។ ប្រទេសបារាំងនឹងបន្តគាំទ្រដល់អាជ្ញាធរលីបង់ក្នុងកិច្ចខិតខំប្រឹងប្រែងរបស់ពួកគេ ដើម្បីស្តារអធិបតេយ្យភាពរដ្ឋ និងបូរណភាពទឹកដីរបស់ប្រទេសវិញ»។
ការកត់សម្គាល់របស់ លោក ម៉ាក្រុង បានកើតឡើង ចំពេលកងទ័ពអ៊ីស្រាអែលបានបន្តការវាយប្រហារប្រចាំថ្ងៃនៅទូទាំងប្រទេសលីបង់ ទោះបីជាមានបទឈប់បាញ់ដែលចូលជាធរមាននៅថ្ងៃទី១៧ ខែមេសា និងត្រូវបានពង្រីករយៈពេល ៤៥ថ្ងៃ បន្ទាប់ពីការចរចាដោយប្រយោល សម្របសម្រួលដោយសហរដ្ឋអាមេរិកក៏ដោយ។
យោងតាមក្រសួងសុខាភិបាលលីបង់ ការវាយប្រហាររបស់អ៊ីស្រាអែលចាប់តាំងពីថ្ងៃទី០២ ខែមីនា មក បានសម្លាប់មនុស្សជាង ៣ ៣៧០នាក់ និងរងរបួសជាង ១០ ០០០នាក់ផ្សេងទៀត។
ស្តីពីភាពតានតឹងរវាងសហរដ្ឋអាមេរិកនិងអ៊ីរ៉ង់ លោក ម៉ាក្រុង និយាយថា ខ្លួនបានជជែកជាមួយមេដឹកនាំក្នុងតំបន់ ដោយសង្កត់ធ្ងន់លើតម្រូវការបន្ទាន់សម្រាប់កិច្ចព្រមព្រៀងឆាប់រហ័សរវាងប្រទេសទាំងពីរ។
លោក ម៉ាក្រុង និយាយថា៖ « ក្នុងឱកាសនោះ យើងត្រូវតែចាប់យកឥឡូវនេះ។ អាទិភាពត្រូវតែជាបទឈប់បាញ់ និងការបើកច្រកសមុទ្រ Hormuz ឡើងវិញជាបន្ទាន់ដោយគ្មានលក្ខខណ្ឌ ដោយស្របតាមច្បាប់អន្តរជាតិ ជាមួយនឹងការចរចាបន្ថែមទៀតដែលមានគោលបំណងឈានដល់កិច្ចព្រមព្រៀងដ៏សំខាន់មួយគ្របដណ្តប់លើកម្មវិធីនុយក្លេអ៊ែរនិងមីស៊ីលផ្លោង ក៏ដូចជាស្ថិរភាពក្នុងតំបន់កាន់តែទូលំទូលាយ»។
ប្រធានាធិបតីបារាំងរូបនេះសង្កត់ធ្ងន់ទៀតថា៖ « ស្ថិរភាពក្នុងតំបន់ត្រូវតែចាប់ផ្តើមជាមួយប្រទេសលីបង់! វាជារឿងបន្ទាន់ដែលអាវុធគ្រប់ដៃត្រូវតែបញ្ឈប់ទាំងអស់គ្នា ហើយនោះជាភាពប្រសើរ»៕
