ត្រាំ នៅតែអួតថា បក្សសាធារណរដ្ឋច្បាស់ជាឈ្នះឆ្នោត «ភ្លូកទឹកភ្លូកដី» បើមានឈ្មោះលោកក្នុងសន្លឹកឆ្នោត

យោងតាមការចុះផ្សាយរបស់ Anadolu នៅថ្ងៃទី៤ ខែវិច្ឆិកា នេះ បានឱ្យដឹងថា ប្រធានាធិបតីអាមេរិក ដូណាល់ ត្រាំ បានចេញមុខអះអាងក្ដែងៗទាំងមិនសូវសប្បាយចិត្តថា គណបក្សសាធារណរដ្ឋ ច្បាស់ជាអាចដណ្ដើមបានជ័យជម្នះនៅក្នុងការបោះឆ្នោតពាក់កណ្ដាលអាណត្តិយ៉ាងភ្លូកទឹកភ្លូកដី ជាមិនខាន ប្រសិនបើមានឈ្មោះរបស់លោក នៅលើសន្លឹកឆ្នោតផ្ទាល់នោះ។

នៅលើបណ្ដាញសង្គមផ្ទាល់ខ្លួន Truth Social លោក ត្រាំ បានសរសេររៀបរាប់វាយប្រហារចំៗយ៉ាងដូច្នេះថា៖ «ខ្ញុំមិនមានឈ្មោះនៅលើសន្លឹកឆ្នោតនោះទេ ហើយប្រសិនបើខ្ញុំមានឈ្មោះវិញ យើងច្បាស់ជាឈ្នះការបោះឆ្នោតនេះយ៉ាងភ្លូកទឹកភ្លូកដីជាក់ជាមិនខាន! សូមអរគុណសម្រាប់ការយកចិត្តទុកដាក់ចំពោះរឿងនេះ»។

ការចេញមកអះអាងបែបផ្ដាច់ការរបស់ប្រធានាធិបតីរូបនេះ បានធ្វើឡើងចំពេលដែលស្ថាប័នសារព័ត៌មានធំៗជាច្រើនរបស់សហរដ្ឋអាមេរិក បាននិងកំពុងវាយតម្លៃ និងព្យាករណ៍ស្របគ្នាថា គណបក្សប្រជាធិបតេយ្យ នឹងវាយដណ្ដើមបានសិទ្ធិគ្រប់គ្រងរដ្ឋសភាជាតិ វិញជាដាច់ខាត។

មុនការបង្ហោះសាររបស់លោក ត្រាំ នេះបន្តិច អ្នកឆ្លើយឆ្លងព័ត៌មានប្រចាំសេតវិមានរបស់ទូរទស្សន៍ NewsNation គឺលោកស្រី Kellie Meyer ក៏បានស្រង់សម្តីមន្ត្រីសេតវិមានម្នាក់ ដែលបានលើកឡើងនូវអំណះអំណាងស្រដៀងគ្នានេះដែរ។ លោកស្រីបញ្ជាក់ថា នៅក្នុងអំឡុងពេលនៃការបោះឆ្នោតពាក់កណ្ដាលអាណត្តិឆ្នាំ២០២៦ នេះ បរិយាកាសនៅខាងក្នុងសេតវិមានគឺស្ថិតក្នុងភាពតានតឹង និងមិនព្រមចុះចាញ់ឡើយ។

លោកស្រី Meyer បានសរសេររៀបរាប់នៅលើបណ្ដាញសង្គម X ដោយផ្អែកលើសម្តីមន្ត្រីលាក់មុខរូបនោះថា ប្រធានាធិបតី ត្រាំ មិនបានស្ថិតនៅលើសន្លឹកឆ្នោតនោះទេ ហើយវាបានបង្ហាញឱ្យឃើញច្បាស់ណាស់ថា ក្រុមអ្នកបោះឆ្នោតស្នូលដែលគាំទ្រលោក ត្រាំ នឹងបង្ហាញខ្លួនទៅបោះឆ្នោត តែនៅពេលណាដែលមានរូបលោកនៅលើសន្លឹកឆ្នោតផ្ទាល់តែប៉ុណ្ណោះ។

យ៉ាងណាមិញ ទន្ទឹមនឹងការបាត់បង់ប្រៀបនៅក្នុងរដ្ឋសភា គណបក្សប្រជាធិបតេយ្យក៏បានវាយបក និងដណ្ដើមបានអាសនៈព្រឹទ្ធសភា ដ៏សំខាន់ៗមួយចំនួនផងដែរ នៅក្នុងរដ្ឋ North Carolina និងរដ្ឋ South Carolina។ ក្នុងនោះ ព្រឹត្តិការណ៍ដែលធ្វើឱ្យលោក ត្រាំ ឈឺក្បាល និងខកចិត្តខ្លាំងបំផុត គឺការដែលអតីតអភិបាលរដ្ឋមកពីបក្សប្រជាធិបតេយ្យ លោក Roy Cooper បានវាយដណ្ដើមដីចាស់ ដោយយកឈ្នះឆ្នោតលើលោក Michael Whatley អតីតប្រធានគណៈកម្មាធិការជាតិបក្សសាធារណរដ្ឋ ដែលជាបេក្ខជនលេចធ្លោ ទទួលបានការគាំទ្រ និងលើកបន្តុបផ្ទាល់ពីសំណាក់លោក ត្រាំ តែម្ដង៕