វៀតណាមបង្កើនការបង្ក្រាបលើការរំលោភកម្មសិទ្ធិបញ្ញា ខណៈអាមេរិកបើកការស៊ើបអង្កេតពាណិជ្ជកម្ម
ប្រទេសវៀតណាមកំពុងបង្កើនកិច្ចខិតខំប្រឹងប្រែងប្រយុទ្ធប្រឆាំងនឹងការរំលោភបំពានលើកម្មសិទ្ធិបញ្ញា (IP) ដោយដាក់ចេញវិធានការអនុវត្តថ្មីៗប្រឆាំងនឹងទំនិញក្លែងក្លាយ ការរំលោភបំពានលើពាណិជ្ជសញ្ញា និងការលួចចម្លងឌីជីថល ខណៈប្រទេសនេះកំពុងប្រឈមមុខនឹងការស៊ើបអង្កេត និងឃ្លាំមើលកាន់តែខ្លាំងឡើងៗពីសហរដ្ឋអាមេរិកលើបញ្ហាពាក់ព័ន្ធនឹងកម្មសិទ្ធិបញ្ញា។ នេះបើតាមការចុះផ្សាយរបស់កាសែត Tuoi Tre កាលពីពេលថ្មីៗ។
នៅទីក្រុងហូជីមិញ អាជ្ញាធរវៀតណាមបានចាប់ផ្តើមយុទ្ធនាការបង្រ្កាបដ៏ធំមួយដែលផ្តោតលើផលិតផលក្លែងក្លាយ និងផលិតផលលួចចម្លងដែលដាក់លក់តាមរយៈវេទិកាពាណិជ្ជកម្មអេឡិចត្រូនិក បណ្តាញសង្គម និងបណ្តាញលក់ផ្សាយផ្ទាល់។ មន្ត្រីវៀតណាមផ្តោតលើទំនិញដែលមានហានិភ័យខ្ពស់ដូចជា គ្រឿងសម្អាង ឱសថ អាហារបំប៉ន ផលិតផលទឹកដោះគោ និងទំនិញប្រើប្រាស់ផ្សេងទៀត ដែលត្រូវបានគេក្លែងបន្លំជាញឹកញាប់។
យុទ្ធនាការដដែលក៏នឹងកំណត់គោលដៅការរំលោភបំពានដែលពាក់ព័ន្ធនឹងពាណិជ្ជសញ្ញាដែលបានការពារ ម៉ាកសម្គាល់ភូមិសាស្ត្រទំនិញ (GI) និងការលួចចម្លងតាមអ៊ិនធឺណិត រួមទាំងគេហទំព័រដែលចែកចាយខ្សែភាពយន្តលួចចម្លង តន្ត្រី ហ្គេមវីដេអូ និងសេវាកម្មផ្សាយតាមអ៊ិនធឺណិតខុសច្បាប់។ បើតាម Tuoi Tre ក្រុមការងារពិសេសមួយដឹកនាំដោយថ្នាក់ដឹកនាំទីក្រុង និងគាំទ្រដោយប៉ូលិស អាជ្ញាធរត្រួតពិនិត្យទីផ្សារ តុលាការ និងភ្នាក់ងារនិយតកម្ម ត្រូវបានបង្កើតឡើង ដើម្បីសម្របសម្រួលកិច្ចខិតខំប្រឹងប្រែងអនុវត្តច្បាប់យ៉ាងហោចណាស់រហូតដល់ចុងឆ្នាំ ២០២៦។
គួរគូសបញ្ជាក់ថា ការបង្ក្រាបរបស់វៀតណាមធ្វើឡើងដើម្បីឆ្លើយតបទៅនឹង «ការស៊ើបអង្កេតតាមមាត្រា ៣០១ ក្រោមច្បាប់ពាណិជ្ជកម្មឆ្នាំ ១៩៧៤» របស់តំណាងពាណិជ្ជកម្មសហរដ្ឋអាមេរិក (USTR) ក្រោយអាមេរិកកំណត់វៀតណាមជា «ប្រទេសបរទេសអាទិភាព» ដែលត្រូវត្រួតពិនិត្យជុំវិញបញ្ហាកម្មសិទ្ធិបញ្ញា។
ឆ្លើយតបទៅនឹងចំណាត់ការរបស់អាមេរិក អ្នកនាំពាក្យក្រសួងការបរទេសវៀតណាម លោកស្រី Pham Thu Hang បានថ្លែងកាលពីថ្ងៃសៅរ៍ថា ការពង្រឹងការការពារច្បាប់កម្មសិទ្ធិបញ្ញា នៅតែជាគោលនយោបាយស្នូលរបស់រដ្ឋាភិបាល។
លោកស្រីបានថ្លែងយ៉ាងដូច្នេះថា៖ «ការពង្រឹងការការពារ និងការអនុវត្តច្បាប់កម្មសិទ្ធិបញ្ញា គឺជាគោលនយោបាយស្របគ្នារបស់វៀតណាម ដែលមានគោលបំណងកសាងបរិយាកាសវិនិយោគ និងអាជីវកម្មដែលមានតម្លាភាព និងមានសុខភាពល្អ គាំទ្រការច្នៃប្រឌិត និងអនុវត្តការប្តេជ្ញាចិត្តអន្តរជាតិយ៉ាងពេញលេញ»។
លោកស្រី Hang បានបន្ថែមថា វៀតណាមត្រៀមខ្លួនរួចជាស្រេចដើម្បីបន្តការពិគ្រោះយោបល់ជាមួយសហរដ្ឋអាមេរិក ហើយសង្ឃឹមថាអាមេរិកនឹងធ្វើ «ការវាយតម្លៃដោយគោលបំណង និងយុត្តិធម៌» ដែលទទួលស្គាល់យ៉ាងពេញលេញនូវកិច្ចខិតខំប្រឹងប្រែង និងសមិទ្ធផលរបស់វៀតណាម៕
