រុស្ស៊ី ទាមទារឱ្យអាមេរិកនិងតួកគី បកស្រាយជុំវិញផែនការផ្ទេរអាវុធយ៉ាងច្រើន ទៅឱ្យអ៊ុយក្រែន
អ្នកនាំពាក្យក្រសួងការបរទេសរុស្ស៊ី បានលើកឡើងកាលពីថ្ងៃសៅរ៍ ថា ប្រទេសរុស្ស៊ីបានស្នើសុំឱ្យទីក្រុងវ៉ាស៊ីនតោន និងទីក្រុងអង់ការ៉ា ពន្យល់ពីរបាយការណ៍មួយពីផែនការផ្ទេរអាវុធ និងគ្រាប់រំសេវដ៏ច្រើនសន្ធឹកសន្ធាប់របស់សហរដ្ឋអាមេរិកទៅកាន់ទីក្រុងកៀវ ដែលកាន់កាប់ដោយប្រទេសតួកគី។ នេះបើយោងតាមទីភ្នាក់ងារសារព័ត៌មាន Reuters ផ្សាយនៅថ្ងៃទី១៥ ខែសីហា ឆ្នាំ២០២៦ ។
អ្នកនាំពាក្យរុស្ស៊ី លោកស្រី Maria Zakharova និយាយក្នុងសេចក្តីថ្លែងការណ៍មួយថា៖ « ការផ្ទេរបែបនេះនឹងបង្កគ្រោះថ្នាក់ធ្ងន់ធ្ងរ[…] ដល់ទំនាក់ទំនងទ្វេភាគីរបស់យើងជាមួយទីក្រុងវ៉ាស៊ីនតោន និងទីក្រុងអង់ការ៉ា»។
ប្រទេសតួកគីបានស្នើសុំការអនុញ្ញាតពីទីក្រុងវ៉ាស៊ីនតោន កាលពីសប្តាហ៍មុន ដើម្បីបញ្ជូនគ្រាប់កាំភ្លើងធំ និងគ្រាប់រ៉ុក្កែតចង្កោមរាប់ម៉ឺនគ្រាប់ ដែលស្ថិតនៅក្នុងឃ្លាំងស្តុកអាវុធរបស់ទីក្រុងអង់ការ៉ាអស់រយៈពេលជាច្រើនទសវត្សរ៍ទៅឱ្យអ៊ុយក្រែន។
អាវុធទាំងអស់នោះ ត្រូវបានផលិតក្រោមអាជ្ញាប័ណ្ណឆ្នាំ១៩៨៧ ពីសហរដ្ឋអាមេរិក។
គួរបញ្ជាក់ថា ទាំងសហរដ្ឋអាមេរិក និងប្រទេសតួកគីមិនមែនជាប្រទេសហត្ថលេខីនៃអនុសញ្ញាស្តីពីគ្រាប់បែកចង្កោមឆ្នាំ២០០៨ សម្រាប់ការហាមឃាត់ប្រើប្រាស់ ការលក់ និងការនាំចេញប្រភេទអាវុធ ដែលរាយប៉ាយគ្រាប់បែកតូចៗ នៅទូទាំងតំបន់ធំទូលាយទេ។
អង្គការឃ្លាំមើលសិទ្ធិមនុស្សព្រមានថា ប្រហែល ៤០% នៃគ្រាប់បែកទាំងនោះ មិនផ្ទុះបន្ទាប់ពីបែកខ្ចាត់ខ្ចាយទេ មានន័យថា វាក្លាយជា មីនប្រឆាំងមនុស្សជាក់ស្តែង អាចធ្វើឱ្យជនស៊ីវិលរងរបួសយូរ បន្ទាប់ពីបញ្ចប់ជម្លោះ៕
