ប៉ូលិសអង់គ្លេស ចាប់ខ្លួនមនុស្ស ៥នាក់ សង្ស័យរៀបចំសកម្មភាពភេរវកម្ម និងប្រើប្រាស់សារធាតុផ្ទុះ ក្បែរមូលដ្ឋានទ័ពអាកាស
បុរស៥នាក់ ត្រូវបានចាប់ខ្លួនពីបទសង្ស័យថា បានរៀបចំ«សកម្មភាពភេរវកម្ម និងបទល្មើសបំផ្ទុះ» បន្ទាប់ពីមានការរាយការណ៍ថា មានយានយន្តគួរឱ្យសង្ស័យចំនួន ៣គ្រឿង បានធ្វើដំណើរឆ្ពោះទៅកាន់មូលដ្ឋានទ័ពអាកាសរបស់អង់គ្លេស(RAF)។ នេះបើយោងតាមការលើកឡើងរបស់ប៉ូលិស និងចុះផ្សាយ ដោយសារព័ត៌មាន BBC នៅថ្ងៃទី២៨ ខែកញ្ញា ឆ្នាំ២០២៦ ។
ហេតុការណ៍ដ៏ធំនេះ ត្រូវបានប្រកាស ហើយប្រជាជនរាប់សិបគ្រួសារនៅជិត អាកាសយានដ្ឋាន RAF Fairford ក្នុងតំបន់ Gloucestershire ត្រូវបានជម្លៀសចេញ បន្ទាប់ពីមានការចេញផ្សាយ នៅម៉ោងប្រមាណ ១២:៤៥នាទីព្រឹក នៅថ្ងៃអាទិត្យ។
ក្រុមកម្ទេចគ្រាប់រំសេវផ្ទុះរបស់កងទ័ព បាននឹងកំពុងត្រួតពិនិត្យយានយន្តនៅជិតមូលដ្ឋាន ដែលប្រើដោយកងទ័ពអាកាសសហរដ្ឋអាមេរិក(USAF) ខណៈប៉ូលិសប្រឆាំងភេរវកម្មបានដឹកនាំការស៊ើបអង្កេត។
ប្រជាពលរដ្ឋត្រូវបានជម្លៀសចេញពីភូមិ Whelford នៅក្បែរនោះ ហើយត្រូវជូនដំណឹងថា ពួកគេនឹងមិនអាចត្រឡប់ទៅផ្ទះវិញនៅយប់មានហេតុការណ៍នោះបានទេ ប៉ុន្តែ អាជ្ញាធរជឿជាក់ថា ស្ថានភាព គ្រប់គ្រងបានហើយ។
តំបន់នោះត្រូវបានហ៊ុមព័ទ្ធដោយខ្សែ«ហាមចូល» ក្នុងរង្វង់ ៤០០ម៉ែត្រ ហើយក្រុមការងារឆ្លើយតប ចំពោះតំបន់ដែលមានហានិភ័យខ្ពស់ ក៏ត្រូវបានដាក់ពង្រាយនៅទីនោះផងដែរ ជាផ្នែកមួយនៃប្រតិបត្តិការឆ្លើយតបបន្ទាន់ទ្រង់ទ្រាយធំ។
គួរបញ្ជាក់ថា ទីតាំងនេះមានប្រវត្តិជាមួយកងទ័ពអាមេរិកយូរលង់មកហើយ ចំណែកថ្មីៗនេះកងទ័ពអាកាសអាមេរិកបានប្រើប្រាស់ជាមូលដ្ឋាន សម្រាប់បើកការវាយប្រហារការពារខ្លួនប្រឆាំងនឹងអ៊ីរ៉ង់។
យ៉ាងណា ជុំវិញរឿងនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើងថា អ្នកដែលត្រូវចាប់ខ្លួនទាំងនោះមានបំណងបង្កការខូចខាតយ៉ាងធ្ងន់ធ្ងរ។
លោកបន្ថែមថា៖ « យើងបានតាមដានពួកគេអស់រយៈពេលជាយូរមកហើយ ហើយទីបំផុតយើងក៏ចាប់ខ្លួនពួកគេបាន»៕
