អាមេរិក ព្រមានថា កូរ៉េខាងជើង កំពុងដកស្រង់បទពិសោធន៍ភស្តុភារយោធា និងពង្រាយទ័ព ក្នុងសង្គ្រាមអ៊ុយក្រែន
មេបញ្ជាការកងកម្លាំងអាមេរិកប្រចាំកូរ៉េខាងត្បូងថ្លែងកាលពីថ្ងៃអង្គារ ទី១៣ ខែតុលា ថា ប្រទេសកូរ៉េខាងជើង កំពុងទទួលបានបទពិសោធន៍ដ៏មានតម្លៃក្នុងការបញ្ជូនកងទ័ពទៅកាន់តំបន់ឆ្ងាយ និងការងារភស្តុភារយោធា តាមរយៈការចូលរួមក្នុងសង្គ្រាមរបស់រុស្ស៊ីប្រឆាំងនឹងអ៊ុយក្រែន។
យោងតាមទីភ្នាក់ងារព័ត៌មាន Yonhap ដែលចេញផ្សាយរបស់សារព័ត៌មាន Anadolu លោក Xavier Brunson មេបញ្ជាការកងកម្លាំងអាមេរិក បានថ្លែងក្នុងកិច្ចពិភាក្សាមួយ ដែលរៀបចំឡើងដោយមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ (CSIS) ក្នុងទីក្រុងវ៉ាស៊ីនតោន ថា ការគាំទ្ររបស់ទីក្រុងព្យុងយ៉ាង ចំពោះទីក្រុងមូស្គូ បានពង្រឹងសមត្ថភាពប្រតិបត្តិការរបស់កូរ៉េខាងជើង។
លោក Brunson លើកឡើងថា៖ «ពួកគេបានរៀនសូត្រពីរបៀបធ្វើដំណើរ ចេញពីកូរ៉េខាងជើងទៅកាន់ប្រទេសរុស្ស៊ី ដើម្បីដឹកជញ្ជូនកងទ័ព អាវុធ និងសម្ភារៈយោធាទៅទីនោះ»។
លោកលើកឡើងថា កងកម្លាំងកូរ៉េខាងជើង បានទទួលបទពិសោធន៍ក្នុងការបង្កើតខ្សែសង្វាក់ផ្គត់ផ្គង់ ការផ្លាស់ទីកងទ័ព ឧបករណ៍លើចម្ងាយឆ្ងាយ និងការចល័តធនធានយោធា ដោយពង្រីកសមត្ថភាព ហួសពីយុទ្ធសាស្ត្រសមរភូមិ។
លោក Brunson ព្រមានថា សមត្ថភាពរបស់ទីក្រុងព្យុងយ៉ាងក្នុងការបញ្ចូលបទពិសោធន៍ក្នុងសម័យសង្គ្រាមទៅក្នុងប្រតិបត្តិការយោធារបស់ខ្លួន អាចធ្វើឱ្យស្មុគស្មាញដល់កិច្ចខិតខំប្រឹងប្រែងទប់ស្កាត់របស់ទីក្រុងវ៉ាស៊ីនតោន និងទីក្រុងសេអ៊ូល។
លោកបន្តថា រុស្ស៊ីបានផ្តល់ឧបករណ៍យោធាដល់កូរ៉េខាងជើង រួមទាំងឧបករណ៍រំខានសង្គ្រាមអេឡិចត្រូនិក ជាថ្នូរនឹងការគាំទ្រ។
ពាក់ព័ន្ធនឹងសំណើផ្ទេរសិទ្ធិគ្រប់គ្រងប្រតិបត្តិការយោធាក្នុងសម័យសង្គ្រាម ពីសហរដ្ឋអាមេរិក ទៅឱ្យកូរ៉េខាងត្បូង លោក Brunson បានបញ្ជាក់ជាថ្មីថា លោកគាំទ្រការផ្ទេរដែលផ្អែកលើលក្ខខណ្ឌជាក់លាក់ ប៉ុន្តែបានព្រមានថា ការអនុវត្តការផ្ទេរនេះ មិនគួរធ្វើឡើង មុនពេលការបំពេញលក្ខខណ្ឌយោធាសំខាន់ មិនត្រូវបានឆ្លើយតបនោះឡើយ។
លោកក៏បានស្នើឱ្យពង្រីកកិច្ចសហប្រតិបត្តិការជាមួយឧស្សាហកម្មការពារជាតិរបស់កូរ៉េខាងត្បូង ដើម្បីបង្កើតសមត្ថភាពថែទាំ និងជួសជុលឧបករណ៍យោធាអាមេរិក នៅក្នុងតំបន់ផងដែរ៕
ប្រភព៖ Anadolu
