លោក ដូណាល់ ត្រាំ ប្រកាសថា អ៊ីរ៉ង់ព្រមលះបង់អាវុធនុយក្លេអ៊ែរ

លោកប្រធានាធិបតីអាមេរិក ដូណាល់ ត្រាំ បានថ្លែងថា ប្រទេសអ៊ីរ៉ង់បានយល់ព្រមមិនអភិវឌ្ឍ ឬមានអាវុធនុយក្លេអ៊ែរនោះឡើយ ហើយលោកផ្ទាល់ប្រហែលជានឹងជួបពិភាក្សាជាមួយមេដឹកនាំកំពូលអ៊ីរ៉ង់ លោក Mojtaba Khamenei នៅពេលណាមួយ ប្រសិនបើរឿងរ៉ាវទាំងឡាយប្រព្រឹត្តទៅដោយរលូន។

នៅក្នុងកិច្ចសម្ភាសន៍មួយតាមកម្មវិធី «Pod Force One» ដែលបានចាក់ផ្សាយកាលពីថ្ងៃពុធ ទី​៣ ខែ​មិថុនា ឆ្នាំ​២០២៦ លោក ត្រាំ បានសង្កត់ធ្ងន់យ៉ាងច្បាស់ៗទាក់ទងនឹងបញ្ហាប្រទេសអ៊ីរ៉ង់ថា ពួកគេបានព្រមព្រៀងគ្នារួចរាល់ហើយ ថានឹងមិនបង្កើតអាវុធមហន្តរាយមួយនេះឡើយ។

នៅពេលគេសួរដេញដោលអំពីការចូលរួមរបស់លោក Khamenei នៅក្នុងកិច្ចចរចាជាមួយសហរដ្ឋអាមេរិក ដើម្បីបញ្ចប់ជម្លោះអរិភាពនោះ លោក ត្រាំ បានឆ្លើយ​ថា មេដឹកនាំកំពូលអ៊ីរ៉ង់រូបនេះ ពិតជាបានចូលរួមយ៉ាងពិតប្រាកដ ហើយប្រជាជនអ៊ីរ៉ង់ហាក់បីដូចជាមានការគោរពកោតក្រែង ចំពោះរូបលោកខ្លាំងណាស់។ ដ្បិត​​មានព័ត៌មានលេចឮមកថា សុខភាពរបស់មេដឹកនាំអ៊ីរ៉ង់​មិនសូវជាល្អប្រសើរ លោកនៅតែ​អាច​បន្តផ្តល់ការអនុម័ត និងការសម្រេចចិត្តផ្សេងៗ ក្នុងអំឡុងពេលចរចាដដែល។ លោក ត្រាំ ក៏បានបន្ថែមទៀតថា រហូតមកទល់ពេលនេះ លោកមិនទាន់មានកិត្តិយសបានជួបលោក Khamenei ផ្ទាល់នៅឡើយទេ ប៉ុន្តែលោកចង់ជួបខ្លាំងណាស់ ហើយអ្នកទាំងពីរអាចនឹងជួបគ្នានៅថ្ងៃណាមួយ អាស្រ័យទៅលើលទ្ធផលជាក់ស្តែងនៃកិច្ចចរចា។

លើសពីនេះទៅទៀត ប្រធានាធិបតីអាមេរិករូបនេះ បានចាត់ទុកថា សង្គ្រាមនៅអ៊ីរ៉ង់ គឺជាជោគជ័យដ៏ធំធេងមួយ សម្រាប់សហរដ្ឋអាមេរិក ពីព្រោះតែកងទ័ពរបស់ប្រទេសអ៊ីរ៉ង់ ត្រូវបានវាយបំបាក់ឱ្យបរាជ័យរួចទៅហើយ។

គួរបញ្ជាក់ថា ជម្លោះមួយនេះ បានផ្ទុះឡើង បន្ទាប់ពីមានការបើកការវាយប្រហាររួមគ្នារវាងអាមេរិក និងអ៊ីស្រាអែលកាលពីថ្ងៃទី២៨ ខែកុម្ភៈ ដែលវាបានធ្វើឱ្យទីផ្សារថាមពលពិភពលោកត្រូវរង្គោះរង្គើ និងបង្កឱ្យមានការមិនពេញចិត្តយ៉ាងខ្លាំងពីសំណាក់ប្រជាជនអាមេរិកាំង ក្នុងពេលដែលការបោះឆ្នោតសភាខែវិច្ឆិកា កាន់តែខិតជិតមកដល់។ លោក ត្រាំ បាននិយាយបែបមានទំនុកចិត្តថា ទោះបីជាកិច្ចព្រមព្រៀងនេះជោគជ័យ ឬមិនជោគជ័យក៏ដោយ ក៏លោកមិនខ្វល់ដែរ ព្រោះបើមិនត្រូវរ៉ូវគ្នាទេ លោកនឹងដោះស្រាយតាមវិធីផ្សេង ពោលគឺអាចនឹងបើកការវាយប្រហារតាមអាកាសឡើងវិញ ដូចដែលលោកធ្លាប់បានព្រមានពីមុនមក៕