លោក តូ ឡឹម ស្នើបារាំងបន្តគាំទ្រកិច្ចព្រមព្រៀងពាណិជ្ជកម្មសេរី អឺរ៉ុប-វៀតណាម (EVFTA) ខណៈវៀតណាម ត្រៀមផ្តល់សច្ចាប័ន កិច្ចគាំពារវិនិយោគ អឺរ៉ុប-វៀតណាម (EVIPA)
ប្រមុខរដ្ឋវៀតណាម លោក តូ ឡឹម (To Lam) ដែលកំពុងបំពេញបេសកកម្មនៅទីក្រុងប៉ារីសប្រទេស បារាំង បានស្នើឲ្យបារាំងបន្តគាំទ្រដល់កិច្ចព្រមព្រៀងពាណិជ្ជកម្មសេរី អឺរ៉ុប-វៀតណាម (EU-Vietnam Free Trade Agreement (EVFTA) ដែលអឺរ៉ុបនិងវៀតណាមសម្រេចបានកាលពីឆ្នាំ២០២០ ស្របពេលដែលការប្រឈមក្នុងប្រព័ន្ធពាណិជ្ជកម្មសកលនាពេលបច្ចុប្បន្ន។
ការលើកឡើងរបស់ តូ ឡឹម បានធ្វើឡើងក្នុងជំនួបអ្នកសារព័ត៌មាន មុនការជែកសម្ងាត់ផ្ទាល់មាត់ទ្វេភាគី ជាមួយប្រធានាធិបតីបារាំង លោក អែមម៉ានូអែល ម៉ាក្រុង (Emmanuel Macron) នៅរសៀសថ្ងៃទី ១០ខែកញ្ញា (ត្រូវយប់ថ្ងៃព្រហស្បតិ៍ម៉ោងនៅកម្ពុជា)។
ប្រធានាធិបតី វៀតណាម លោក តូ ឡឹម ត្រូវបានស្រង់សម្តីចុះផ្សាយដោយទីភ្នាក់ងារព័ត៌មានវៀតណាម VNA បាននិយាយថា កិច្ចព្រមព្រៀងការពារវិនិយោគ អឺរ៉ុប-វៀតណាម EU-Vietnam Investment Protection Agreement (EVIPA) ក៏នឹងត្រូវរំពឹងថា នឹងផ្តល់សច្ចាប័នក្នុងពេលឆាប់ខាងមុខ ដែលវានឹងបើកចំហនូវទស្សនវិស័យថ្មី។
នៅក្នុងការចេញផ្សាយនោះ ប្រមុខរដ្ឋវៀតណាម បានអះអាងថា មហិច្ឆតារបស់បារាំងដើម្បីក្លាយជាដៃគូឈានមុខរបស់វៀតណាមក្នុងវិស័យថាមពល ហេដ្ឋារចនាសម្ព័ន្ធដឹកជញ្ជូន ការអភិវឌ្ឍន៍ក្រុង បច្ចេកវិទ្យាសិប្បនិម្មិត និង នវានុវត្តន៍ ស្ថិតនៅក្នុងចំណោមវិស័យផ្សេងៗទៀត។
សារព័ត៌មានវៀតណាម ក៏បានស្រង់សម្តីរបស់ប្រធានាធិបតីបារាំង លោក ម៉ាក្រុង ដែលបង្ហាញនូវបំណងសម្រាប់កិច្ចសហប្រតិបត្តិការទ្វេភាគី ឲ្យទៅលើសពីសេចក្តីថ្លែងការណ៍ ឬក៏ ការចុះហត្ថលេខាលើកិច្ចព្រមព្រៀងយុទ្ធសាស្រ្ត និង ត្រូវប្រែក្លាយទៅជាសកម្មភាពជាក់ស្តែងនៅក្នុងល្បឿនមួយដ៏លឿន។
លោក ម៉ាក្រុង បានបង្ហាញនូវជំនឿជឿជាក់ថា ការបំពេញទស្សនកិច្ចរបស់ប្រធានាធិបតីវៀតណាម នឹងពន្លឿនបន្ថែមទៀតនូវការអនុវត្តនៃកិច្ចព្រមព្រៀងសហប្រតិបត្តិការរវាងប្រទេសទាំង២។
លោក តូ ឡឹម ក៏បានលើកឡើងដែរថា កិច្ចសហប្រតិបត្តិការលើវិស័យអប់រំ និងការថែទាំសុខភាព គឺជាវិស័យនិមិត្តរូបនៃមិត្តភាពរវាងបារាំង និងវៀតណាម ដោយលោកបានសង្កត់ធ្ងន់ថា ភាគីទាំងពីរគួរតែផ្តល់អាទិភាពខ្ពស់បំផុតដល់ការផ្លាស់ប្តូរនិស្សិតសិក្សាុ។
ប្រទេសវៀតណាម និង សហគមន៍អឺរ៉ុប បានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយគ្នាតាំងពីខែមិថុនាឆ្នាំ២០១៩ និងចូលធរមាននៅខែសីហាឆ្នាំ២០២០ បន្ទាប់ពី សភាអឺរ៉ុបបានផ្តល់សច្ចាប័ននៅថ្ងៃទី ១២ខែកុម្ភៈឆ្នាំ២០២០ ហើយ វៀតណាមបានផ្តល់សច្ចាប័ននៅថ្ងៃទី៨ខែមិថុនាឆ្នាំ២០២០៕
