(ណៃពិដោ)៖ សាក្សីនិងភ្នាក់ងារជួយសង្រ្គោះ បានអះអាងកាលពីថ្ងៃសៅរ៍ ទី១៤ ខែវិច្ឆិកា ឆ្នាំ២០២៦ ថាការវាយប្រហារតាមផ្លូវអាកាសរបស់យោធាមីយ៉ាន់ម៉ា ចំលើជំរំស្នាក់នៅរបស់ប្រជាជនដែលបានភៀសខ្លួនដោយសារសង្គ្រាមស៊ីវិល បានបណ្តាលឱ្យមនុស្ស១២នាក់ស្លាប់ នៅក្នុងរដ្ឋ Rakhine ចុងភាគខាងលិចប្រទេស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
អ្នកលក់ដូរម្នាក់វ័យ២៧ឆ្នាំម្នាក់ ឈ្មោះ Chit Su Wai បានយំសោកនៅពេលរៀបរាប់ថា កូនស្រី ម្តាយមីង និងម្តាយបង្កើតរបស់ខ្លួន ត្រូវបានសម្លាប់ក្នុងការវាយប្រហារ ដែលកើតឡើងកាលពីថ្ងៃសុក្រ នៅជំរំជនភៀសខ្លួន Byar La តំបន់ Ponnagyun ភាគឦសានពីទីក្រុង Sittwe។
អាជីកររូបនោះ បានប្រាប់ថា មនុស្ស ១២នាក់បានស្លាប់ក្នុងការវាយប្រហារកាលពីថ្ងៃសុក្រ ដែលតួលេខនេះត្រូវបានទទួលស្គាល់ដោយលោក Khine Hein Htet ប្រធានមូលនិធិ Phyusin Yin Khwin ដែលជាអង្គភាពផ្តល់សេវាសង្គ្រោះ និងជំនួយបន្ទាន់នៅក្នុងតំបន់។ លោក Khine Hein Htet បាននិយាយថា ក្នុងចំណោមអ្នកស្លាប់ រួមមានទាំងកុមារអាយុ៥ឆ្នាំម្នាក់ ហើយមនុស្ស ១៨នាក់ផ្សេងទៀ តក៏បានរងរបួសនៅក្នុងជំរំនោះផងដែរ។ ប្រជាជនជាច្រើននៅក្នុងជំរំនេះ បានរស់នៅទីនោះអស់រយៈពេល៤ឆ្នាំមកហើយ។
គួរបញ្ជាក់ថា ប្រទេសមីយ៉ាន់ម៉ាបានធ្លាក់ក្នុងសង្គ្រាមស៊ីវិល ចាប់តាំងពីយោធាបានធ្វើរដ្ឋប្រហារកាលពី៥ឆ្នាំមុន ដែលបង្កឱ្យផ្ទុះជាចលនាតស៊ូប្រដាប់អាវុធ ពីសំណាក់ក្រុមសកម្មជនប្រជាធិបតេយ្យ ព្រមទាំងក្រុមជនជាតិភាគតិចប្រដាប់អាវុធ ដែលជាយូរមកហើយបានកាន់កាប់ឥទ្ធិពលនៅតាមតំបន់ផ្សេងៗគ្នា នៃប្រទេសនេះ។ រដ្ឋ Rakhine ដែលស្ថិតនៅមបណ្តោយឆ្នេរភាគខាងលិច គឺជាតំបន់មួយក្នុងចំណោមតំបន់ដែលរងផលប៉ះពាល់ធ្ងន់ធ្ងរបំផុតពីសង្គ្រាមស៉ីវិល។ រដ្ឋនេះស្ទើរតែទាំងស្រុងស្ថិតក្រោមការគ្រប់គ្រងរបស់ក្រុម Arakan Army ឬ AA ដែលជាក្រុមប្រដាប់អាវុធជនជាតិភាគតិចដ៏មានឥទ្ធិពលមួយ ហើយត្រូវបានយោធាមីយ៉ាន់ម៉ាបិទខ្ទប់ និងបន្តរងការវាយប្រហារតាមអាកាសជាប្រចាំ៕





