ក្នុងកិច្ចប្រជុំកំពូលអាស៊ាន ម៉ាឡេស៊ី ថ្កោលទោស អ៊ីស្រាអែល បណ្តេញពលរដ្ឋប៉ាឡេស្ទីន ពីលំនៅឋាន និងបង្អត់អាហារ
កាលពីថ្ងៃចន្ទ ទី១៦ ខែវិច្ឆិកា ឆ្នាំ២០២៦ នាយករដ្ឋមន្ត្រីម៉ាឡេស៊ី លោក Anwar Ibrahim បានថ្កោលទោស ចំពោះការបង្ខំប្រជាជនប៉ាឡេស្ទីនឱ្យផ្លាស់ទីលំនៅ ចេញពីតំបន់ West Bank ដែលកំពុងកាន់កាប់ដោយអ៊ីស្រាអែល និងស្ថានភាពមនុស្សធម៌កាន់តែអាក្រក់ទៅៗ ក្នុងតំបន់ហ្គាហ្សា។
ថ្លែងក្នុងកិច្ចប្រជុំកំពូលលើកទី១៦ រវាងអង្គការសហប្រជាជាតិ និងសមាគមប្រជាជាតិអាស៊ីអាគ្នេយ៍( អាស៊ាន) នៅទីក្រុងម៉ានីល ប្រទេសហ្វីលីពីន លោក Anwar បានអំពាវនាវឱ្យមានបទឈប់បាញ់ ជាបន្ទាន់ និងអចិន្ត្រៃយ៍ ការផ្តល់ជំនួយមនុស្សធម៌ដោយគ្មានការរារាំង និងការការពារសម្រាប់បុគ្គលិកមនុស្សធម៌ នៅក្នុងទឹកដីប៉ាឡេស្ទីន។

លោក Anwar លើកឡើងលើប្រព័ន្ធផ្សព្វផ្សាយ X ថា៖ «ម៉ាឡេស៊ី ថ្កោលទោសយ៉ាងខ្លាំង ចំពោះអំពើឃោរឃៅដែលកំពុងបន្ត ការបង្ខំឱ្យផ្លាស់ទីលំនៅ និងគ្រោះទុរ្ភិក្ស កើតលើប្រជាជនប៉ាឡេស្ទីន»។
ការកត់សម្គាល់របស់នាយករដ្ឋមន្រ្តីម៉ាឡេស៊ីរូបនេះ បានកើតឡើង ចំពេលមានអំពើហិង្សាកើនឡើងប្រឆាំងនឹងប្រជាជនប៉ាឡេស្ទីន ពីសំណាក់អ្នកតាំងលំនៅខុសច្បាប់ក្នុងតំបន់ West Bank និងបញ្ហាទឹកជំនន់ នៅតំបន់ហ្គាហ្សា ស្របពេលអ៊ីស្រាអែល នៅតែបន្តការវាយប្រហារ។
លោក Anwar បានបន្តថា ប្រទេសម៉ាឡេស៊ី បានកោតសរសើរ លើការរួមចំណែករបស់ប្រទេសចិន ចំពោះកិច្ចខិតខំប្រឹងប្រែងផ្នែកមនុស្សធម៌ និងកសាងតំបន់ហ្គាហ្សាឡើងវិញ។
ងាកទៅរកកិច្ចសហប្រតិបត្តិការក្នុងតំបន់ លោកសង្កត់ធ្ងន់អំពីភាពចាំបាច់ក្នុងការប្រែក្លាយផែនការសកម្មភាព ASEAN-UN ឆ្នាំ២០២៦-២០៣០ ឱ្យទៅជាលទ្ធផលជាក់ស្តែង ជាពិសេសក្នុងវិស័យបៃតង ឌីជីថល ការទប់ទល់នឹងការប្រែប្រួលអាកាសធាតុ និងការអភិវឌ្ឍប្រកបដោយចីរភាព។

លោកបានបន្ថែម៖ «ខ្ញុំ ក៏បានជំរុញឱ្យមានកំណែទម្រង់អង្គការសហប្រជាជាតិដ៏ក្លាហានជាងមុន រួមទាំងការលុបបំបាត់អំណាចវេតូ ដែលបានរារាំងក្រុមប្រឹក្សាសន្តិសុខ អង្គការសហប្រជាជាតិ ពីការធ្វើសកម្មភាពដោយយុត្តិធម៌ និងមានប្រសិទ្ធភាពជាយូរមកហើយ។ ប្លុកប្រទេសចំនួន ១១ ក៏ត្រូវតែបន្តគាំទ្រគោលការណ៍ ភាពជាកណ្តាលរបស់អាស៊ាន និងឧត្តមភាពនៃច្បាប់អន្តរជាតិក្នុងការរុករកការប្រកួតប្រជែងភូមិសាស្ត្រនយោបាយ ដែលកំពុងប្រឈមកាន់តែខ្លាំងឡើង»៕


