#ចលនាមាតាធម្មជាតិកម្ពុជា (#MotherNature #Cambodia) អំពាវនាវឱ្យប្រជាពលរដ្ឋខ្មែរចូលរួមបរិច្ចាគថវិកាជួយដល់យុវជនចលនាមាតាធម្មជាតិចំនួន ៥នាក់ដែលកំពុងតស៊ូនឹងភាពអយុត្តិធម៌ក្នុងពន្ធនាគារ។
ចលនាមាតាធម្មជាតិកម្ពុជា បានសរសេរលើទំព័រហ្វេសប៊ុករបស់ខ្លួននៅថ្ងៃទី២៥ តុលា នេះថា សូមប្រជាពលរដ្ឋខ្មែរដែលស្រឡាញ់#បរិស្ថាន ចូលរួមគាំទ្រសកម្មជនបរិស្ថាននៅប្រទេសកម្ពុជា ដើម្បីអនាគតភពផែនដីសម្រាប់កូនចៅជំនាន់ក្រោយ ព្រោះថវិកាបរិច្ចាគពីអ្នកចូលរួមទាំងអស់ ពិតជាមានតម្លៃអស្ចារ្យណាស់ក្នុងកិច្ចការងារដើម្បីបរិស្ថាន។
ប្រភពដដែលអំពាវនាវឱ្យប្រជាពលរដ្ឋខ្មែរចូលរួមគាំទ្រសកម្មជនបរិស្ថានកម្ពុជាទាំង ៥នាក់ ដែលកំពុងតស៊ូក្នុង#ពន្ធនាគារ តទល់នឹងប្រព័ន្ធយុត្តិធម៌នៃរបបក្រុងភ្នំពេញដែលបានចោទប្រកាន់ និងចាប់ឃុំខ្លួនពួកគេទាំងអយុត្តិធម៌ក្នុងពេលបច្ចុប្បន្ននេះ។
កាលពីថ្ងៃទី២ ខែកក្កដា ឆ្នាំ២០២៤ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសសកម្មជនចលនាមាតាធម្មជាតិ ១០នាក់ និងបានចាប់ឃុំខ្លួនចំនួន ៥នាក់ ក្រោមបទចោទប្រកាន់ #រួមគំនិតក្បត់ និង#ប្រមាថព្រះមហាក្សត្រ ដែលត្រូវផ្ដន្ទាទោសឱ្យជាប់ពន្ធនាគារចន្លោះពី ៦ ទៅ ៨ឆ្នាំ ព្រមទាំងតម្រូវឱ្យឃុំខ្លួនក្នុងពន្ធនាគារនៅតាមខេត្តចំនួនប្រាំខុសៗគ្នាផងដែរ។
ជុំវិញការចាប់ខ្លួននេះ អង្គការក្រៅរដ្ឋាភិបាលដែលមានមូលដ្ឋាននៅក្រៅស្រុកចំនួន ៦៧ស្ថាប័ន ដូចជា អង្គការបណ្ដាញសេរីភាពបញ្ចេញមតិអាស៊ីអាគ្នេយ៍ (Southeast Asia Freedom of Expression Network) អង្គការបណ្ដាញយុវជនអាកាសធាតុរស់ឡើងវិញ (Youth Climate Resilience Network) និងអង្គការយុវជនដើម្បីសហគមន៍បៃតង (Youth for Green Communities) ជាដើម បានចេញសេចក្តីថ្លែងការណ៍រួមគ្នាកាលពីដើមខែតុលា ឆ្នាំ២០២៤ នេះ ដោយទាមទារឱ្យរាជរដ្ឋាភិបាលកម្ពុជាដោះលែងសកម្មជនទាំង ៥នាក់ដោយឥតលក្ខខណ្ឌ។
ចំណែកឯប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៥ តុលា នេះថា ការចាប់ខ្លួនសកម្មជនបរិស្ថានដាក់ពន្ធនាគារជាផ្នែកមួយដែលនាំឱ្យប៉ះពាល់សិទ្ធិមនុស្សយ៉ាងធ្ងន់ធ្ងរ ហើយក៏ជាកត្តាមួយនាំឱ្យប៉ះពាល់ដល់ការវិនិយោគ និងវិស័យទេសចរណ៍នៅកម្ពុជាដែរ។
លោក ម៉ែន ណាត លើកឡើងថា សកម្មជនបរិស្ថានមិនមែនជាឧក្រិដ្ឋជនព្រៃឈើទេ ប៉ុន្តែត្រូវរដ្ឋាភិបាលចាប់ដាក់គុកទាំងអយុត្តិធម៌។ ផ្ទុយទៅវិញ ឧក្រិដ្ឋជនព្រៃឈើ ដូចជា ឧកញ៉ា ទ្រី ភាព ឧកញ៉ា លី យ៉ុងផាត់ ជាដើម មិនត្រឹមតែគ្មានទោសទេ ថែមទាំងត្រូវរដ្ឋាភិបាលផ្តល់សិទ្ធិឱ្យពួកគេប្រព្រឹត្តបទឧក្រិដ្ឋកាន់តែខ្លាំងថែមទៀត។
ប្រធានក្រុមប្រឹក្សាឃ្លាំមើលកម្ពុជារូបនេះបញ្ជាក់ថា ការចាប់សកម្មជនបរិស្ថានដាក់គុក គឺមានន័យស្មើនឹងបើកដៃឱ្យឧក្រិដ្ឋជនព្រៃឈើបំផ្លាញបរិស្ថានបន្តទៀត ដូច្នេះហើយបានជាព្រៃឈើខ្មែរតែងរងនូវការបំផ្លាញពីមួយឆ្នាំទៅមួយឆ្នាំដោយសារតែមានការគប់គិតគ្នារវាងមន្ត្រីរដ្ឋាភិបាល និងក្រុមឧក្រិដ្ឋជនទាំងនោះ។
កាលពីអំឡុងឆ្នាំ២០២១ សកម្មជនចលនាមាតាធម្មជាតិ ធ្លាប់ទទួលបានពានរង្វាន់អ្នកការពារសិទ្ធិមនុស្សជួរមុខប្រចាំតំបន់អាស៊ីប៉ាស៊ីហ្វិក (Frontline Defender for Asia Pacific) ពីអង្គការ Frontline Defender ជុំវិញកិច្ចខិតខំប្រឹងប្រែងរបស់ពួកគេក្នុងការការពារសិទ្ធិពលរដ្ឋ និងការការពារធនធានធម្មជាតិនៅកម្ពុជា។
ក្រៅពីនោះ សកម្មជនបរិស្ថានទាំងនេះក៏បានទទួលពានរង្វាន់ Rights Livelihood Award ជុំវិញសកម្មភាពការពារធនធានធម្មជាតិនៅប្រទេសកម្ពុជាពីរដ្ឋាភិបាលប្រទេសស៊ុយអែត កាលពីចុងខែវិច្ឆិកា ឆ្នាំ២០២៣ កន្លងទៅដែរ៕